नागपूर : चोरी, लूटमार करणाऱ्या एका भामट्याला शांतीनगर पोलिसांनी अटक केली. स्वप्निल गजानन तेलमासरे (वय २०) असे आरोपीचे नाव आहे. तो कळमण्यातील चित्रशाळा नगरात राहतो.
तेलमासरे हा सराईत गुन्हेगार आहे. शांतीनगरातील बास्केटबॉल ग्राउंडजवळ राहणारे सुनीलकुमार बाबूलाल जैन (वय ६१) मार्च महिन्यात मध्य प्रदेशात गेले होते. लॉकडाऊनमुळे ते तिकडे अडकून पडले. आरोपी तेलमासरेने जैन यांच्या दाराचा कडीकोयंडा तोडून १२ हजारांची रोकड चोरून नेली. जैन यांनी ३ एप्रिलला दिलेल्या तक्रारीवरून शांतीनगर पोलिसांनी गुन्हा दाखल केला. संशयित आरोपी तेलमासरे हा बुधवारी रात्री ७.३० च्या सुमारास बाबा रामसुमेरनगर परिसरात उभा असल्याची माहिती शांतीनगर पोलिसांना मिळाली. त्यावरून पोलिसांनी त्याला ताब्यात घेतले. पोलीस ठाण्यात आणून त्याची चौकशी केली असता त्याने जैन यांच्याकडे केलेल्या चोरीची कबुली दिली. चौकशीदरम्यान त्याने मंगळवारी रात्री नऊच्या सुमारास नंदनवन पोलीस ठाण्याच्या हद्दीत प्रकाश शाहू नाम इसमाला चाकू मारून लुटल्याचीही कबुली दिली. पोलिसांनी त्याला अटक केली असून पुढील तपास सुरू आहे. शांतीनगरचे ठाणेदार मुकुंद ठाकरे यांच्या नेतृत्वात पोलीस उपनिरीक्षक अरुण बकाल, हवालदार अब्दुल वकील शेख, विनोद समुद्रे, प्रवीण जाधव आदींनी ही कारवाई केली.
--