नागपूर : लोखंड चोरी करीत असलेल्या आरोपीला हटकले असता त्याने लोखंडी सळाखीने सुरक्षा रक्षकाच्या मांडीवर सळाखीने वार करून त्यास जखमी केल्याची घटना तहसिल पोलिस ठाण्यांतर्गत २९ फेब्रुवारी २०२४ रोजी रात्री ९.२० वाजताच्या सुमारास घडली. या प्रकरणी तहसिल पोलिसांनी आरोपीला अटक केली आहे. अब्दुल जावेद अब्दुल रशीद (३४, रा. बोरियापुरा, मोमीनपुरा) असे अटक करण्यात आलेल्या आरोपीचे नाव आहे.
फिर्यादी सुभाष भोजराज पटले (३१, रा. प्रजापती मार्ग, भोईपुरा, गणेशपेठ) हे मेयो रुग्णालयात सुरक्षा रक्षकाची नोकरी करतात. गुरुवारी २९ फेब्रुवारीला ते कर्तव्यावर असताना त्यांना आरोपी अब्दुल कॅज्युल्टी वॉर्डच्या टेरेसवीर लोखंड चोरी करताना दिसला. त्यांनी आरोपीला हटकले असता आरोपीने त्याच्या जवळील लोखंडी सळाखीने सुभाष यांच्या मांडीवर वार करून त्यांना जखमी केले. या प्रकरणी सुभाष यांनी दिलेल्या तक्रारीवरून तहसिल पोलिसांनी आरोपीविरुद्ध कलम ३५३, ३७९, ५११ नुसार गुन्हा दाखल करून आरोपीला अटक केली आहे.