लोकमत न्यूज नेटवर्क
नागपूर : देशभरातील हजारो गुंतवणूकदारांचे कोट्यवधी रुपये हडपणाऱ्या ठगबाज विजय रामदास गुरनुले याने त्याच्या अमरावतीतील नातेवाईकाकडे रोकड लपवून ठेवली होती. विशेष म्हणजे, ही रोकड त्याने घरात खड्डा करून त्यात पुरून ठेवली होती. पोलिसांनी अमरावतीला छापा मारून ही ५५ लाखांची रक्कम जप्त केली, अशी माहिती पोलीस उपायुक्त नुरूल हसन यांनी मंगळवारी दुपारी पत्रकारांना दिली.
महाठग विजय गुरनुले आणि त्याच्या टोळीतील साथीदारांचे फसवणुकीचे नवनवे किस्से पुढे येत आहेत. त्यासंबंधीची माहिती उपायुक्त हसन यांनी आज एका पत्रकार परिषदेत दिली. आपल्याविरुद्ध गुन्हा दाखल झाल्याचे कळताच महाठग गुरनुले फरार झाला. त्याने बनवाबनवी करून जमविलेली रोकडही इकडे तिकडे लपवून ठेवण्यासाठी धावपळ केली. मात्र पोलिसांनी त्याच्या मुसक्या बांधल्या. सध्या तो पीसीआरमध्ये आहे. चौकशीत त्याने अमरावतीच्या एका नातेवाईकाकडे रोकड लपवून ठेवली, अशी माहिती दिली. त्यानुसार विशेष तपास पथक सोमवारी गुरनुलेच्या अमरावतीतील नातेवाईकाच्या घरी धडकले. त्यांनी संपूर्ण घरात शोधाशोध केली. मात्र रोकड मिळाली नाही. त्यामुळे पोलिसांनी गुरनुलेला खाक्या दाखविला. त्यानंतर त्याने नातेवाईकाच्या घरात खड्डा खोदून त्यात रक्कम लपवून ठेवल्याचे सांगितले. त्याने ती जागाही दाखवली. त्यानुसार पोलिसांनी खड्ड्यातून ५५ लाखांची रोकड बाहेर काढून ती जप्त केली.