- मोरेश्वर मानापुरे
नागपूर : गेल्या आठवड्यात प्रति किलो शुद्ध चांदीचे भाव ८,४०० रुपयांनी वाढले. आंतरराष्ट्रीय बाजारातील घडामोडींमुळे औद्योगिक क्षेत्राकडून चांदीला मागणी वाढल्याने तेजीला पाठिंबा मिळाला आणि दरदिवशी चांदीचे भाव वाढून शनिवार, ७ जून रोजी १,०६,१०० रुपयांवर स्थिरावले.
सराफांकडे ३ टक्के जीएसटीसह १,०९,२८३ रुपयांत विकली गेली. दुसरीकडे दहा ग्रॅम शुद्ध सोन्याचे भाव ६०० रुपयांनी वाढून जीएसटीविना ९६,२०० रुपयांवर पोहोचले. गेल्या आठवड्यात २ जून रोजी चांदीचे भाव ३१ मेच्या तुलनेत २,६०० रुपयांनी वाढून जीएसटीविना १,००,३०० रुपयांवर पोहोचले. ३ जूनला १,६०० रुपयांची वाढ झाली. ४ जूनला मागणीअभावी भाव स्थिर होते.
५ जून रोजी चांदीच्या भावात तब्बल ४,२०० रुपयांची वाढ झाली आणि भावपातळी १,०६,१०० रुपयांवर पोहोचली. ६ जून रोजी भाव पुन्हा ४०० रुपयांनी वाढले. मात्र, शनिवार, ७ जून रोजी चांदी ४०० रुपयांनी घसरून १,०६,१०० रुपयांवर स्थिरावली. सोमवार, ९ जून रोजी खुलत्या बाजारात चांदीचे भाव किती वाढतील, याकडे सराफांचे लक्ष लागले आहे.