डोळ्याचे पारणे फेडणारा शिवराज्याभिषेक सोहळा

महाराष्ट्राचे लाडके दैवत असलेल्या छत्रपती शिवाजी महाराजांच्या शिवराज्याभिषेक सोहळ्याने आज नागपुरातील शिवभक्तांच्या डोळ्याचे पारणे फेडले. शिवराज्याभिषेक सोहळा समितीच्यावतीने शिवाजी चौक,

महाल परिसर दुमदुमला : शिवशाहीर बाबासाहेब पुरंदरेंची उपस्थिती नागपूर : महाराष्ट्राचे लाडके दैवत असलेल्या छत्रपती शिवाजी महाराजांच्या शिवराज्याभिषेक सोहळ्याने आज नागपुरातील शिवभक्तांच्या डोळ्याचे पारणे फेडले. शिवराज्याभिषेक सोहळा समितीच्यावतीने शिवाजी चौक, गांधीगेट महाल येथे हा सोहळा शिवराज्याभिषेक दिनानिमित्त आयोजित करण्यात आला. शास्त्रोक्त वेदमंत्रांच्या उच्चारणात शिवाजींच्या राज्याभिषेकाचे एतिहासिक महत्त्व जपताना पार पडलेला हा सोहळा आपण थेट शिवाजी महाराजांचा खराखुराच राज्याभिषेक अनुभवीत असल्याचा भास निर्माण करणारा होता. याप्रसंगी वातावरणात कमालीचा उत्साह आणि आनंद पसरला. या कार्यक्रमाला शहरातील आबालवृद्ध मोठ्या संख्येने उपस्थित होते. त्यात शिवशाहीर बाबासाहेब पुरंदरे, सद्गुरुदास महाराज, राजे मुधोजी भोसले, राजे संग्रामसिंग भोसले, ज्ञानेश्वर पुरंदरे, सुमंत टेकाडे, नगरसेवक बंडू राऊत, नगरसेविका प्रभा जगनाडे, रश्मी फडणवीस, प्रभाकरराव भोसले प्रामुख्याने उपस्थित होते. या सोहळ्याच्या माध्यमातून शिवाजी महाराजांचे चरित्र सामान्यांपर्यंत पोहोचावे म्हणून या सोहळ्याचे आयोजन २४ शिवप्रेमी संघटनांनी एकत्रितपणे केले होते. शिवराज्याभिषेक सोहळा संपूर्ण महाराष्ट्रात रायगड व नागपूर अशा दोनच जागी आयोजित करण्यात येतो. या सोहळ्याचा प्रारंभ सकाळी ७.३० वाजता करण्यात आला. शिवाजी महाराजांची पालखी टिळक पुतळा येथून काढण्यात आली. ११ ब्राह्मणांच्या वैदिक मंत्रघोषाने व पंचामृताने महाराजांना स्नान घालण्यात आले. त्यानंतर नजराणाही दाखविण्यात आला. याप्रसंगी सर्र्वांनीच मंगलवेश धारण केला होता. शिवकालीन क्रीडा प्रात्यक्षिकांनी या सोहळ्याला रंगत आणली. स्व. चिमासाहेब भोसले व्यायाम शाळेच्या विद्यार्थ्यांनीही प्रात्यक्षिके सादर केली. याप्रसंगी विविध प्रकारच्या शस्त्रांचे प्रात्यक्षिक सादर करण्यात आले. यात मोठ्या संख्येने मुलींनीही क्रीडा प्रकार सादर केले. हा सोहळा यशस्वी करण्यासाठी दत्ता शिर्के, महेश महाडिक, रणजित जोशी, दिलीप दिवटे, श्रीकांत देहाडराय, सुधीर अभ्यंकर, विवेक पोहाणे, श्याम तांबोळी, प्रवीण घरजाळे, रोहन सावंत, पंकज पराते, नीलेश पंडाग्रे, भूषण वानखेडे, सचिन वाघाडे, विशाल देवकर, जय आस्कर, आनंद कोतेवार, अभिजित डायगव्हाणे, प्रसाद काळे, आकाश ठाकरे, सुहास माहूरकर, क्षितिज नवघरे, संकेत बांगडकर, सानिध्य लटोर, शुभम पेकडे, भागवत तिवारी, अनंता नरसापूरकर, पराग सपाटे, अतुल ढाकरे, कुशांक गायकवाड, श्रद्धा पाठक, श्वेता भोसले, ऋचा शिर्के, श्वेता दहीकर यांनी परिश्रम घेतले. (प्रतिनिधी)