नागपूर- मूकबधिर तरुणीवर अनेक महिन्यापासून अत्याचार झाल्याची घटना समोर आली आहे. एका नराधमाने तरूणीवर अनेक महिन्यापासून अत्याचार केल्याने त्या महिलेला गर्भधारणा झाली. हा प्रकार उघड झाल्यानंतर तरुणीने ऐन दस-याच्या दिवशी स्वत:ला पेटवून घेतलं. ती तरूणी सध्या मृत्युशी झूंज देत आहे. प्रचंड संताप निर्माण करणारी ही घटना जरीपटका पोलीस ठाण्याच्या हद्दीत घडली आहे.
पीडित तरुणी ३४ वर्षांची आहे. वडील नसल्याने आई आणि भाऊ मोलमजुरी करून कसे बसे घर चालवितात. त्यासाठी ते दिवसभर घराबाहेर असतात. जन्मापासूनच मूकबधिर असलेली ही तरुणी घरीच राहते. तिच्या असहायतेचा गैरफायदा घेऊन एका नराधमाने तिच्यावर सहा महिन्यांपासून अत्याचार करणं सुरू केला होता. रोजच्या दोन वेळेच्या भाजीभाकरीची सोय करण्यासाठी सकाळपासून उशिरारात्रीपर्यंत बाहेर राहणा-या तिच्या वृद्ध आईला तिच्यावरील अत्याचाराची कल्पनाही नव्हती. दस-याच्या दिवशी आईने तिची आंघोळ घालण्यासाठी तिला जवळ बोलविले. तिचे पोट एकदम वर आल्याचे दिसल्याने आई हादरली. तिने सांकेतिला शब्दात मुलीला विचारणा केल्यावर पीडित तरूणीने घडलेला सर्व प्रकार तिच्या आईला सांगितला. यानंतर घाबरलेल्या तरूणीने स्वतःला जाळून घेतलं.
गंभीर अवस्थेत तिला हॉस्पिटलमध्ये दाखल करण्यात आलं. या प्रकारानंतर तिच्यावरील अत्याचाराला वाचा फुटली. या घटनेने माहिती परिसरात झाल्याने संतापाचे वातावरण निर्माण झाले. प्रकरण पोलिसांकडे पोहचले. तिची अवस्था गंभीर असल्यामुळे आणि तिला कसलीही माहिती देत येत नसल्यामुळे तिच्या आईचे जबाब नोंदविला आहे. त्यानंतर पोलिसांनी पाच दिवसांपासून हे प्रकरण दडवून ठेवण्याचा प्रयत्न केला पण पत्रकारांना या प्रकरणाची कुणकुण लागल्यामुळे गुरुवारी रात्री याबाबत विचारणा सुरू झाली. त्यानंतर पोलिसांनी बलात्काराचा गुन्हा दाखल केला. आरोपीचा शोध घेतला जात आहे.