मंगेश व्यवहारे
देशभरातील एक हजार विद्यार्थ्यांमध्ये निवड : उपक्रमाची वर्ल्ड रेकॉर्डमध्ये होणार नोंद
नागपूर : तामिळनाडूतील रामेश्वरम येथे ७ फेब्रुवारीला जागतिक रेकॉर्ड बनविण्याची तयारी सुरू आहे. यासाठी देशभरातील १ हजार विद्यार्थी १०० उपग्रह बनवित आहेत. ते उपग्रह अंतराळात ७ फेब्रुवारीला सोडण्यात येणार आहे. यासाठी देशभरातून अंतराळाची आवड असणाऱ्या १००० विद्यार्थ्यांची निवड केली जात आहे. यात नागपूर महापालिकेच्या सुरेंद्रगड हिंदी माध्यमिक शाळेच्या दोन विद्यार्थिनींची निवड झाली आहे. ही बाब नागपूर महापालिकेसाठी गौरवास्पद आहे.
मनपाच्या शाळांची अवस्था सर्वांना परिचित आहे. पण सुरेंद्रगड हिंदी माध्यमिक शाळेतील विद्यार्थ्यांनी मनपाच्या शाळेतही गुणवत्ता ठासून भरली असल्याचा परिचय करून दिला आहे. डॉ. ए.पी.जे. अब्दुल कलाम इंटरनॅशनल फाऊंडेशनचा हा उपक्रम आहे. यात देशभरातून शालेय व महाविद्यालयीन विद्यार्थ्यांची निवड केली जात आहे. शालेय जीवनात अंतराळ तंत्रज्ञानाविषयी जिज्ञासा निर्माण करून भविष्यात स्पेस टेक्नॉलॉजीमध्ये विद्यार्थ्यांचे योगदान वाढावे ही यामागील संकल्पना आहे. यात जगातील सर्वात कमी वजनाचे १०० उपग्रह बनवून ७ फेब्रुवारी रोजी ३८००० मीटर उंचीवर सोडण्यात येणार आहे. हे उपग्रह प्रत्यक्ष वातावरणाची माहिती घेऊन पृथ्वीवरील केंद्राला पाठवतील. हा उपक्रम एक जागतिक विक्रम होणार आहे. यामध्ये सहभाग घेण्यासाठी मनपाच्या सुरेंद्रगड शाळेच्या विद्यार्थ्यांनी ऑनलाईन फॉर्म भरले होते. यात स्वाती मिश्रा व काजल शर्मा या दोन विद्यार्थिनींची निवड झाली आहे.
सध्या डॉ. ए.पी. जे कलाम फाऊंडेशनतर्फे उपग्रह बनविण्यासाठी या विद्यार्थ्यांचे ऑनलाईन प्रशिक्षण सुरू आहे. या विद्यार्थ्यांना वर्ल्ड रेकॉर्डच्या व्हॉट्सअ‍ॅप ग्रुपमध्ये जॉईन करण्यात आले आहे. १८ ते २२ दरम्यान पुणे येथे ऑफलाईन प्रशिक्षण होणार आहे. यात उपग्रह बनविण्याचे प्रशिक्षण देण्यात येणार आहे. सोबतच ते बनविण्यासाठी आवश्यक असलेली कीट सुद्धा दिली जाणार आहे. या उपक्रमासाठी सहभागी विद्यार्थ्यांकडून १० हजार रुपये शुल्क आकारण्यात येत होते. पण मनपाच्या या विद्यार्थ्यांकडून सहभाग शुल्क घेण्यात आले नाही. जागतिक रेकॉर्डमध्ये आपली निवड झाल्याबद्दल दोन्ही विद्यार्थ्यांनी आनंद व्यक्त केला.
- आमचे विद्यार्थी यापूर्वीही मंगळ अभियानात सहभागी झाले होते. आता रामेश्वरम येथे प्रस्थापित होणाऱ्या जागतिक विक्रमासाठी आमच्या शाळेच्या विद्यार्थ्यांची निवड होणे हे महापालिकेसाठी गौरवास्पद बाब आहे. स्लम भागातील ही मुले आहेत. पण शाळेतील मुख्याध्यापक व शिक्षकांनी या मुलांच्या क्षमतेचा पूर्णपणे वापर केला आहे. या मुलांची अशा उपक्रमात निवड होणे ही मनपा शाळेच्या गुणवत्तेची पावती आहे.
-दीप्ती बिस्ट, विज्ञान शिक्षिका, सुरेंद्रगड हिंदी माध्यमिक शाळा