लोकमत न्यूज नेटवर्क
नागपूर - स्कुटीवरील तीन आरोपींनी एका सायकलरिक्षा चालकाला दगडाने मारून जखमी केले. शिवाजी सायन्स कॉलेजसमोर मेट्रोच्या पुलाखाली रविवारी पहाटे ही घटना घडली. अमन खान नैमुल्ला खान (वय ४५, रा. चुनाभट्टी) हे आपला सायकलरिक्षा घेऊन रविवारी पहाटे ४ च्या सुमारास पुलाखालून जात असताना वेगात आलेल्या स्कुटीवरील तीन भामट्यांनी त्यांच्या रिक्षाला कट मारला. खान यांनी याबाबत आरोपींना टोकले असता त्यांनी खाली उतरून खान यांच्यासोबत वाद घातला. नंतर बाजूचा दगड उचलून खान यांच्या डोक्यावर मारून त्यांना जबर जखमी केले. एवढेच नव्हे तर त्यांनी दिवसरात्र कष्ट करून जमवून ठेवलेले १३, ३०० रुपये जबरदस्तीने हिसकावून घेत आरोपी पळून गेले. खान यांनी धंतोली ठाण्यात या घटनेची तक्रार नोंदवली. हे भामटे दारूच्या नशेत असावे आणि त्यांनी लुटमारीच्या उद्देशाने जाणीवपूर्वकच खान यांच्या रिक्षाला कट मारला असावा, असा संशय आहे. पोलीस आरोपींचा शोध घेत आहेत.