नागपूर : रेल्वे मार्गाने अनेकदा अमली पदार्थांची वाहतूक करण्यात येते. बऱ्याच वेळा लोहमार्ग पोलीस, आरपीएफच्यावतीने कारवाई करण्यात येते. परंतु अनेकदा माहिती न मिळाल्याने तस्कर तस्करी करण्यात यशस्वी होतात. त्यामुळे अमली पदार्थ विरोधी दिनानिमित्त लोहमार्ग पोलिसांनी रेल्वेस्थानकावरील ऑटोचालक, कुलींशी संवाद साधून त्यांना अमली पदार्थांची वाहतूक होत असल्यास सूचना देण्याचे आवाहन केले.
नागपूर रेल्वेस्थानकावर आयोजित कार्यक्रमात लोहमार्ग पोलीस निरीक्षक सतीश जगदाळे यांनी कुली, ऑटोचालकांना सतर्क राहुन अमली पदार्थांची तस्करी होत असल्यास त्वरित लोहमार्ग पोलिसांना सूचना देण्यास सांगितले. कार्यक्रमात अमली पदार्थाच्या सेवनामुळे आरोग्यावर दुष्परिणाम होत असून कुटुंब उद्ध्व‌‌स्त होत असल्यामुळे अमली पदार्थांच्या सेवनापासून दूर राहण्याचे आवाहन करण्यात आले. नुकतीच लोहमार्ग पोलिसांनी ब्राऊन शुगरची तस्करी करणाऱ्या एका टोळीला गजाआड केले आहे. वर्षभरात हजारो किलो गांजा जप्त करण्यात येतो. यावरून अमली पदार्थांच्या आहारी जाणाऱ्यांचे प्रमाण फार मोठे असल्यामुळे अशा व्यक्तींना या नशेपासून दूर ठेवण्याचे आवाहन यावेळी करण्यात आले. कार्यक्रमाचे आयोजन हवालदार गजानन शेळके यांनी केले. कार्यक्रमाला उपनिरीक्षक विजय तायवाडे, राजेश पाली, नामदेव सहारे, अमोल हिंगणे आणि लोहमार्ग ठाण्यातील कर्मचारी, ऑटोचालक आणि कुली मोठ्या संख्येने उपस्थित होते.
.............