लोकमत न्यूज नेटवर्क
नागपूर : महापालिकेने शहरातील फूटपाथवरील अतिक्रमण हटविण्याची मोहीम हाती घेतली आहे. ती स्वागतार्ह आहे. पण सोबतच दुकानदारांनी रस्त्यावर व फूटपाथवर केलेले अतिक्रमण काढून रस्ते मोकळे करण्याचे निर्देश महापौर दयाशंकर तिवारी यांनी गुरुवारी सर्वसाधारण सभेत दिले.
शहरात अनेक ठिकाणी दुकानाच्या बाहेरील परिसराचा वापर हा व्यवसायाकरिता करण्यात येतो. गर्दीच्या ठिकाणी तर चक्क दुकानासह रस्त्यावरही व्यवसाय केला जातो. यामुळे वाहतुकीच्या कोंडीसह अपघाताची शक्यता अधिक असते. अशा अतिक्रमणाची तक्रार नसली तरी मनपाने तात्काळ प्रभावाने कारवाई करावी, असे निर्देश महापौरांनी दिले.
अतिक्रमणासंदर्भात स्थगन प्रस्ताव मांडताना विरोधी पक्षनेते तानाजी वनवे यांनी शहरात जागोजागी अतिक्रमण असल्याचे निदर्शनास आणले. अतिक्रमणासंदर्भात तक्रारी प्रशासनाकडे केल्या, परंतु कारवाई होत नाही. गोरगरिबांवर कारवाईचा बडगा उगारला जातो. परंतु, मोठ्यांचे अतिक्रमण काढले जात नाही. मनपाचे पथकदेखील बड्या अतिक्रमणधारकांकडून पैसे घेत असल्याचा आरोप केला. नाग नदीच्या काठावरील, मोमिनपुऱ्यासह अनेक ठिकाणी कारवाईची आवश्यकता आहे. परंतु तिथे कारवाई न करता गरज नसलेल्या ठिकाणी मनपा कारवाई करीत असल्याची भूमिका त्यांनी मांडली. दरम्यान, त्यांनी नाग नदी जवळ असलेल्या एका नर्सरीचा उल्लेख केला. यासंदर्भात प्रशासनाने ही जागा नासुप्रची असल्याचे सांगितले.
...
तक्रार असो वा नसो कारवाई करा
अतिक्रमणासंदर्भात शासनाचे तसेच न्यायालयाचे आदेश आहेत. त्यानुसार जागेची मालकी कुणाचीही असो तेथील अतिक्रमण काढण्याचा अधिकार महापालिकेला आहे. त्यानुसार नर्सरीवर तात्काळ कारवाई करा, अतिक्रमणासंदर्भात महापालिकेकडे तक्रार असा वा नसो मोहीम राबवून असे सर्व अतिक्रमण काढण्याचे निर्देश महापौरांनी दिले.