निशांत वानखेडे लोकमत न्यूज नेटवर्क नागपूर : वाघांची राजधानी म्हणून नागपूरचा उल्लेख होतो व सेलिब्रिटींपासून जगभरातले पर्यटक पर्यटनासाठी दरवर्षी येथे येत असतात. ताडोबा, पेंच, उमरेड कन्हांडला व्याघ्र प्रकल्पात पर्यटकांचे लोंढे वाढत आहेत. मात्र, येथील जंगल सफारी आता सामान्य पर्यटकांच्या अवाक्याबाहेर गेले आहे. पावसाळ्यानंतर पर्यटन सुरू होताच सफारीचे दर ५०० ते ७०० रुपयापर्यंत वाढले आहेत, एवढेच नाही तर निवास खर्चातही मोठी वाढ झाली आहे.
नागरिकांसाठी जंगल सफारी आता आवडीचा विषय झाला आहे. ख्रिसमसच्या सुट्ट्या आणि नवीन वर्षाचे सेलिब्रेशन करण्यासाठी जंगल सफारीला प्राधान्य दिले जाते. मात्र, ही सफारी आता सामान्यांच्या अवाक्याबाहेर जात आहे. पावसाळ्यानंतर सफारी सुरू होताच दर मोठ्या प्रमाणात वाढले आहेत. जिल्ह्यात पेंच व्याघ्र प्रकल्प हे सफारीचे सर्वात मोठे स्थळ मानले जाते, येथे ६ पर्यटकांच्या जिप्सीची सफारी ५०२५ रुपयांवरून ५५२५ रुपये झाली आहे. त्यानुसार मोठ्या कॅन्टरचे दरही ७०० रुपयापर्यंत वाढले आहेत. शिवाय वनविभागाच्या पर्यटक निवासाचे दरही २०० ते ४०० रुपयांनी वाढले आहे. पेंचच्या सुरेवानी, कोलितमारा, सिल्लारी व चोरवाहुली येथे असलेल्या एका रेस्ट रूमचे दर २२०० रुपये होते, जे २४०० रुपये अधिक १२ टक्के जीएसटी असे वाढले आहेत. खाजगी रिसॉर्टचे दर तर प्रतिव्यक्ती ३००० रुपयांपर्यंत वाढले आहेत.
शनिवार, रविवारचे दर वेगळे
- उमरेड कहांडला अभयारण्याचे दरही वाढले आहेत. २५० वर्गकिमीमध्ये पसरलेल्या या अभयारण्यात १० ते १२ वाघ आहेत. लहान जंगल क्षेत्र असल्याने येथे सहज वाघाचे दर्शन होते.
- पावसाळ्यापूर्वी ६ लोकांच्या सफारीचे ३८२५ रुपये होते, ज्यामध्ये वन परवानगी ८५० रुपये, जिप्सी २५०० आणि गाईडचे ४७५ रुपये अंतर्भूत होते.
- आता मात्र सफारी ४४७५ रुपयांवर गेली आहे. यात जिप्सी व गाईडचे दर सारखेच आहेत पण वन परवानगीचे शुल्क ६५० रुपयांनी वाढून १५०० रुपये करण्यात आले आहेत. २०० ते ४०० रुपये कॅमेरा शुल्क वेगळा द्यावा लागतो आहे.
- शनिवारी आणि रविवारी तर सफारीचे दर ४९७५ रुपये घेतले जातात, ज्यात वन परवानगी शुल्क २००० रुपये करण्यात आले आहे.
तरीही ख्रिसमस, न्यू इयर फुल्ल सफारी महागली असली तरी पर्यटनात कमतरता आली नाही. ख्रिसमसच्या सुट्ट्या व नवीन वर्षाचे सेलिब्रेशन करण्यासाठी जंगल सफारीला प्राधान्य दिले जात आहे. त्यामुळे २० डिसेंबर ते ५ जानेवारीपर्यंत पेंच व उमरेड कहांडलाची सफारी फुल्ल झाली आहे. पर्यटक तिकीट मिळण्यासाठी ऑनलाइन व ऑफलाइन, असे दोन्ही प्रयत्न करूनही बुकिंग मिळेना झाली आहे. त्यामुळे आता प्लॅनिंग केले, तरी ५ जानेवारीनंतरचीच बुकिंग मिळेल, अशी स्थिती आहे.