लोकमत न्यूज नेटवर्क
नागपूर : एप्रिल महिन्याच्या तिसऱ्या आठवड्यात कोरोना आणखी घातक ठरण्याची चिन्हे दिसून येत आहेत. सोमवारी एकाच दिवसात जिल्ह्यात ११३ जणांचा बळी गेला. आतापर्यंत २४ तासातील ही सर्वाधिक मृत्युसंख्या ठरली. ६ हजार ३६४ नवे बाधित आढळून आले असून मृत्यूच्या वाढत्या संख्येमुळे जनतेसोबत प्रशासनामध्येदेखील दहशत निर्माण झाली आहे.
जिल्ह्यामध्ये आढळलेल्या एकूण बाधितांपैकी ४ हजार ५७८ शहरातील असून १ हजार ७८० ग्रामीण भागातील आहेत. मृतकांमध्ये शहरातील ७५, ग्रामीणमधील ३२ व जिल्ह्याबाहेरील सहा जणांचा समावेश आहे. आतापर्यंत जिल्ह्यात एकूण ३ लाख २९ हजार ४७० बाधित व ६ हजार ३८६ जणांच्या मृत्यूची नोंद झाली आहे.
चाचण्यांची संख्या घटली, बरे होणारे वाढले
सोमवारच्या अहवालानुसार ५ हजार ९७ बाधित ठीक झाले. यात शहरातील ३ हजार ९९७, तर ग्रामीणमधील १ हजार १०० जणांचा समावेश आहे. दुसरीकडे चाचण्यांची संख्या मात्र घटली. १७ हजार ९७८ जणांची चाचणी झाली. यात शहरातील १३ हजार ३९८ व ग्रामीणमधील ४ हजार ५८० जणांचा समावेश होता.
सक्रिय रुग्ण ७० हजारापार
जिल्ह्यात ७० हजार ३९७ सक्रिय रुग्ण आहेत. यात शहरातील ४२ हजार २८५ व ग्रामीणमधील २८ हजार ११२ जणांचा समावेश आहे. सरकारी व खासगी रुग्णालयांत २० हजार २४६ रुग्ण दाखल आहेत, तर ५० हजार १५१ रुग्ण ‘होम आयसोलेशन’मध्ये आहेत.
असे वाढले मृत्यू
...
दिनांक -मृत्यू-नवे ‘पॉझिटिव्ह’
१५ एप्रिल- ७४ -५,८१३
१६ एप्रिल- ७५ -६,१९४
१७ एप्रिल- ७९ -६,९५६
१८ एप्रिल- ८५ -७,१०७
१९ एप्रिल- ११३ -६,३६३