पाकिस्तानसाठी हेरगिरी करणाऱ्या निशांत अग्रवालला तीन वर्षे कारावासाची शिक्षा

Nagpur : पाकिस्तानसाठी हेरगिरी करून भारताची सुरक्षा, सार्वभौमत्व व अखंडता धोक्यात टाकणारा ब्रह्मोस एयरोस्पेस कंपनीचा देशद्रोही अभियंता निशांत प्रदीपकुमार अग्रवाल (२८) याला मुंबई उच्च न्यायालयाच्या नागपूर खंडपीठाने सोमवारी तीन वर्षे कारावासाची सुधारित शिक्षा सुनावली.

नागपूर :पाकिस्तानसाठी हेरगिरी करून भारताची सुरक्षा, सार्वभौमत्व व अखंडता धोक्यात टाकणारा ब्रह्मोस एयरोस्पेस कंपनीचा देशद्रोही अभियंता निशांत प्रदीपकुमार अग्रवाल (२८) याला मुंबई उच्च न्यायालयाच्यानागपूर खंडपीठाने सोमवारी तीन वर्षे कारावासाची सुधारित शिक्षा सुनावली. न्यायमूर्तीद्वय अनिल किलोर व प्रवीण पाटील यांनी हा निर्णय दिला.

निशांत नेहरूनगर, रुडकी, जि. हरिद्वार (उत्तराखंड) येथील मुळ रहिवासी असून तो भारत व रशियाचा संयुक्त उपक्रम असलेल्या ब्रह्मोस एयरोस्पेस कंपनीच्या नागपूरातील प्रकल्पामध्ये सिस्टिम इंजिनियर पदावर कार्यरत होता आणि उज्ज्वलनगर येथे भाड्याच्या घरात राहत होता. सत्र न्यायालयाने त्याला ३ जून २०२४ रोजी माहिती तंत्रज्ञान कायद्यातील कलम ६६-एफ अंतर्गत जन्मठेप, शासकीय गुपिते कायद्यातील कलम ३(१)(सी) अंतर्गत १४ वर्षे सश्रम कारावास तर, कलम ५(१)(ए)(बी)(सी)(डी) आणि कलम ५(३) अंतर्गत तीन वर्षे सश्रम कारावास व तीन हजार रुपये दंड अशी शिक्षा सुनावली होती. त्या निर्णयाविरुद्ध अग्रवालने उच्च न्यायालयात अपील दाखल केले होते. त्यात हा निर्णय देण्यात आला. सरकारच्या वतीने ॲड. संजय डोईफोडे व ॲड. अनुप बदर तर, अग्रवालतर्फे वरिष्ठ ॲड. सुनील मनोहर यांनी बाजू मांडली.

लखनौ एटीएस पथकाची कारवाई

पाकिस्तानमधून नेहा शर्मा व पूजा रंजन या नावाने फेसबुक तर, सेजल कपूर नावाने लिंक्ड-इन अकाऊंट संचालित केले जात होते. अग्रवालसह भारताच्या सुरक्षा विभागातील काही कर्मचारी या गुप्तहेरांच्या संपर्कात असल्याची माहिती लखनौ एटीएस कार्यालयाला मिळाली होती. त्यानंतर अग्रवालला ८ आक्टोबर २०१८ रोजी अटक करण्यात आली.