लोकमत न्यूज नेटवर्क
नागपूर : कपिलनगर पोलीस ठाणे अंतर्गत आवळेनगरात एका युवकाने त्याला धमकावणाऱ्या गुन्हेगाराचा दगडाने ठेचून खून केला. ही घटना गुरुवारी दुपारी घडली. पोलिसांनी आरोपी राकेश मोतीलाल पटेल (३२) रा.मानव नगर याला अटक केली. शैलेश बालाजी देशभ्रतार (३४) रा. आवळेनगर असे मृताचे नाव आहे. कपिलनगरातचार दिवसात खुनाची ही दुसरी तर शहरातील तिसरी घटना आहे. त्यामुळे नागरिकांमध्ये दहशत पसरली आहे.
शैलेश जुना गुन्हेगार आहे. त्याच्याविरुद्ध खुनाचा प्रयत्न, मारहाणीसह अनेक गुन्हे दाखल आहेत. यामुळे तो लोकांना आपल्या दहशतीत ठेवण्याचा प्रयत्न करीत असे. नेहमीच क्षुल्लक कारणावरून लोकांना मारहाण करायचा. राकेशसोबतही त्याची ओळख होती. दोघांनी दुपारी ३.३० वाजता आवळेनगरातील देशी दारूच्या दुकानातून दारू खरेदी केली. एकाखाली भूखंडावर जाऊन ते दारू पिऊ लागले. यादरम्यान शैलेश मारहाण करीत राकेशला धमकावू लागला. दोघांमध्ये वाद झाला. शैलेश खून करण्याची धमकी देऊ लागला. नंतर नशा अधिक झाल्याने शैलेश तिथेच झोपला. त्याला झोपल्याचे पाहून राकेशने दगडाने त्याचे डोके ठेचून त्याचा खून केला. घटनेची माहिती होताच कपिलनगर पोलीस व डीसीपी नीलोत्पल घटनास्थळी पोहोचले. पोलिसांनी राकेशला अटक करून खुनाचा गुन्हा दाखल केला.
गेल्या चार दिवसातील खुनाची ही दुसरी घटना आहे. रविवारी रात्री तडीपार दीपक ऊर्फ गोलू राजपूत याची त्याचाच साथीदार तुषार गजभिये व प्रेमचंद ऊर्फ टोनी मारोतकर याने हत्या केली होती. तिघेही जुने मित्र आहेत. तुषारने त्याच्या बहिणीला त्रास देत असल्यामुळे हत्या केल्याचे सांगितले आहे. परंतु सूत्रानुसार परिसरात वर्चस्व प्रस्थापित करण्यावरून सुरु असलेल्या गॅंगवॉरमुळे खून झाल्याचे सांगितले जाते. गोलूचा परिसरात दबदबा होता. तो संपवण्यासाठी आरोपींनी गोलूची हत्या केली. बुधवारी रात्री सुद्धा गुन्हेगारांनी एका युवकावर जीवघेणा हल्ला केला आहे.