योगेश पांडे, लोकमत न्यूज नेटवर्क, नागपूर: शिवीगाळ केल्याच्या संशयावरून तरुणाला झापड मारणाऱ्या ट्रकचालकाची हत्या करण्यात आली. ही घटना सोमवारी रात्री कळमना मार्केटच्या प्रवेशद्वाराजवळ घडली. पोलिसांनी चार आरोपींना अटक केली आहे.
शिवराज श्रीचंद्र (२९, कौसंबी, उत्तरप्रदेश) असे मृतक ट्रकचालकाचे नाव आहे. तर मंडला येथील पंकज मन्सराम आहेरवार (२५), संजय सूर्यप्रकाश उईके (१८), पाटणसावंगीतील अभिजीत हेतराम तुरकर (२५) व शेख फारूख शेख हुसेन (३६, सिंधीबन, सक्करदरा) अशी आरोपींची नावे आहेत. आरोपीदेखील ट्रकचालक आहेत. ते कळमना मार्केटमध्ये मालाची ने-आण करतात. सोमवारी मध्यरात्रीच्या सुमारास कळमना मार्केटच्या प्रवेशद्वारासमोर पंकज हा त्याच्या सहकाऱ्यांना शिवीगाळ करत होता. तर शिवराज जवळच उभा होता. तो दारूच्या नशेत होता व पंकजने त्यालाच शिवीगाळ केल्याचा संशय आला. तो पंकजजवळ गेला वाद घालू लागला. त्याने पंकजच्या कानशिलात लगावली. ही बाब पंकजने त्याच्या मित्रांना सांगितली. पंकज आणि त्याच्या साथीदारांनी शिवराजवर हल्ला केला. आरोपींनी शिवराजच्या डोक्यात शस्त्राने वार करून गंभीर जखमी केले. त्याचे दोन मित्रही जखमी झाले. घटनेची माहिती मिळताच कळमना पोलीस घटनास्थळी दाखल झाले. त्यांनी शिवराजला दवाखान्यात नेले. तेथे त्याला मृत घोषित करण्यात आले. कळमना पोलिसांनी खुनाचा गुन्हा दाखल करून आरोपींना अटक केली आहे.