लोकमत न्यूज नेटवर्क
नागपूर : जन्म देणाऱ्या आईनेच पैशासाठी वेश्याव्यवसायात ढकलल्याने चार वर्षांपासून नरकयातना भोगणाऱ्या एका अल्पवयीन मुलीने अखेर पोलीस ठाणे गाठले. तिची कैफियत नोंदवून पोलिसांनी तिच्या आईवर पिटा कायद्यानुसार गुन्हा दाखल केला.
पीडित मुलगी बाहेरगावची रहिवासी आहे. २०१७ मध्ये तिच्या आईने तिला वेश्याव्यवसायात ढकलण्यासाठी नातेवाइकांच्या स्वाधीन केले. नातेवाइकांनी मुलीला एका डान्सबारमध्ये सोडले. मुलीची इच्छाच नसल्याने डान्सबारवाल्यांना तिचा परफॉर्मन्स चांगला वाटला नाही. त्यामुळे त्यांनी तिला तिच्या गावी पोहोचवले.
२०१८ मध्ये तिच्या आईने एका व्यक्तीला २ लाखांत विकले. त्या ठिकाणी पीडितेचे लैंगिक शोषण झाले. मात्र, तिच्याकडून पाहिजे तसा फायदा मिळत नसल्याने त्या व्यक्तीनेही मुलीला तिच्या गावात नेऊन सोडले. २०२० मध्ये पुन्हा तिच्या आईने नातेवाइकांच्या मदतीने नागपूरच्या कुंटनखान्यात विकले. येथे पीडित मुलीच्या जेवणात गुंगीचे औषध मिळवून तिच्याकडून वेश्याव्यवसाय करवून घेतला जाऊ लागला. तिला मारहाणही होत होती. संधी साधून ती एका ग्राहकाच्या मदतीने नागपुरातून गावी परत गेली.
आजीने दिली साथ
यावेळी तिच्या आजीने तिला साथ दिली. तू येथे राहिलीस तर तुला पुन्हा तुझी आई वेश्याव्यवसायात ढकलेल, असे सांगून तिला पोलिसांकडे जाण्याचा सल्ला दिला. त्यामुळे पीडित मुलीने लकडगंज ठाणे गाठून बुधवारी स्वत:च्या आईविरुद्ध तक्रार नोंदवली.