आरटीओ, वाहतूक पोलीस : कारवाई करतील काय?
नागपूर : वाहनांवर नंबर टाकताना तो एका विशिष्ट आकारात टाकण्यात यावा, असा नियम आहे, मात्र याकडे वाहनधारक दुर्लक्ष करतात. त्यामुळे अंकांतून दादा, मामा, काका, राम अशी अक्षरे नंबरप्लेटवर झळकतात. आता यात ‘मोदी’ नावाचीही भर पडली आहे. भाजपाचे वरिष्ठ नेते नितीन गडकरी यांच्या विजयी रॅलीमध्ये या नंबर प्लेटची मोटारसायकल सर्वांचेच लक्ष वेधून घेत होती. शहरात उपप्रादेशिक परिवहन कार्यालय पूर्व, प्रादेशिक परिवहन कार्यालय (आरटीओ) शहर आणि ग्रामीण आरटीओ कार्यालयातून दिवसाकाठी साधारण पन्नासच्यावर नव्या मोटारसायकलची नोंद होते. परंतु वाहनाच्या नंबर प्लेटवर नंबर लिहून देणार्‍यांना मात्र, आरटीओ किंवा वाहतूक पोलिसांकडून सूचना, मार्गदर्शन केले जात नाही. सोबतच विचित्र नंबर टाकून देणार्‍यांवर कारवाई होत नाही. त्यामुळे चित्रविचित्र नंबर प्लेट तयार करून घेण्याचे फॅड वाढले आहे. उपराजधानीत सुमारे दोन हजारावर अशा विचित्र नंबरप्लेट असलेली वाहने रस्त्यावरून बिनधास्त धावत आहेत. विशेष म्हणजे चौकाचौकात उभ्या असलेल्या वाहतूक पोलिसांनी मोटार व्हेईकल अ‍ॅक्टच्या कलम ५० (१) (१७७) नुसार दंडात्मक कारवाई करणे अपेक्षित आहे. परंतु कठोर कारवाईच होत नसल्याने आणि फक्त १०० रुपये दंड असल्याने अशा नंबर प्लेटचे फॅड वाढत आहे. शुक्रवारी गडकरी यांच्या विजयी रॅलीमध्ये ‘मोदी’ नंबर प्लेटची मोटारसायकल सर्वांचे लक्ष वेधून घेत होती. ४७४९ या इंग्रजी अंकातून वाहनधारकाने ‘मोदी’ नाव साकारले. याला पाहून अनेक वाहनधारकाच्या नंबर प्लेटवर ‘मोदी’ झळकण्याची शक्यता आहे. (प्रतिनिधी) हे आहेत नियम दुचाकी, तीनचाकी, चारचाकी वाहने आदी वर्गवारीनुसार वाहनाचे नंबर कसे असावेत, त्यांचा आकार कसा असावा, याबाबत निश्चित नियम आहेत. दुचाकी वाहनांवर नंबर टाकताना समोरच्या नंबर प्लेटवरील अक्षरे व अंकांची जाडी पाच मिलिमीटर तर उंची ३० मिलिमीटर असावी. दोन अक्षरांमधील अंतर हे पाच मिलिमीटर असावे. मागील नंबर प्लेटवरील अक्षरे व अंकांची जाडी सात मिलिमीटर, उंची ३५ मिलिमीटर असावी. चारचाकी वाहनांच्या पुढील व मागील नंबर प्लेटवरील अक्षरे व अंकांची जाडी १० मिलिमीटर, उंची ६५ मिलिमीटर असावी. दोन अक्षरांमधील अंतर हे १० मिलिमीटर असावे, असा नियम आहे, मात्र या नियमांची काटेकोरपणे अंमलबजावणी होताना दिसून येत नाही.