नागपूर : लग्नाचे आमिष दाखवत एका विद्यार्थिनीवर दोन तरुणांनी सामूहिक अत्याचार केल्याची बाब समोर आली आहे. यातील एक आरोपी एलएलबीचा विद्यार्थी असून त्याला ताब्यात घेण्यात आले आहे. हिंगणा पोलीस ठाण्याअंतर्गत ही घटना घडली. पोलिसांनी आरोपी सुजात असीम शर्मा (२२, रा.धरमपेठ) व वृषभ गजभिये (२४, रा.चंद्रपूर) यांच्याविरोधात गुन्हा दाखल केला असून सुजातला अटक केली आहे.
सुजात शर्मा हा एलएलबीच्या अंतिम वर्षाचा विद्यार्थी आहे. २४ वर्षीय पीडित विद्यार्थिनी ही सुजातच्या शाळेत शिकत होती. त्यांची अगोदरपासून ओळखी होती. विद्यार्थिनीच्या तक्रारीनुसार, जानेवारी महिन्यात सुजात अनेक दिवसांनी पुन्हा मुलीला भेटला. त्यानंतर दोघांमध्ये मोबाईलवर संभाषण सुरू झाले. लग्नाच्या बहाण्याने सुजातने विद्यार्थिनीवर बळजबरी केली. लग्नाचे आमिष दाखवत तो विद्यार्थिनीला हिंगणा येथील रिसॉर्टसह अनेक ठिकाणी घेऊन गेला. तेथे त्याने विद्यार्थिनीशी शारीरिक संबंध ठेवले. गेल्या काही काळापासून सुजातने लग्नाचा विषय निघाला की टाळाटाळ सुरू केली होती. विद्यार्थिनीने दबाव टाकल्याने त्याने त्याचा मित्र वृषभ गजभिये याचा मोबाईल क्रमांक दिला व त्याच्याशी बोलण्यास सांगितले.
वृषभचा क्रमांक दिल्यानंतर सुजातने मुलीचा फोन उचलणेही बंद केले. सुजातची सत्यता जाणून घेण्यासाठी विद्यार्थिनीने वृषभ गजभिये याच्याशी संपर्क साधला. मदत करण्याच्या बहाण्याने वृषभने विद्यार्थिनीला हॉटेलमध्ये बोलावले. तेथे त्याने तिच्याशी जबरदस्तीने शारीरिक संबंध ठेवले. यानंतर मुलीने हा प्रकार घरच्यांना सांगितला. कुटुंबीयांकडून लगेच हिंगणा पोलीस ठाण्यात तक्रार दाखल करण्यात आली. याप्रकरणी शारीरिक अत्याचाराचा गुन्हा दाखल करून सुजात शर्माला अटक करण्यात आली आहे.
घरात शिरून अल्पवयीन मुलीवर अत्याचार
हिंगण्यातच एका तरुणाने अल्पवयीन मुलीला वासनेचा शिकार बनविले. वर्धा जिल्ह्यातील आर्वीतील २१ वर्षीय वैभव रंगनाथ बोंडवे याने १३ वर्षीय पीडित मुलीला आपल्या जाळ्यात ओढले. २३ मे रोजी दुपारी मुलगी घरात एकटीच होती. त्यावेळी वैभव हा मुलीच्या घरी शिरला व त्याने तरुणीशी बळजबरीने शारीरिक संबंध ठेवले. यादरम्यान मुलीची आईच्या घरी आल्याने वैभवने तेथून पळ काढला. मुलीने सत्य परिस्थिती आईला सांगितली. आईच्या तक्रारीवरून हिंगणा पोलिसांनी शारीरिक अत्याचार आणि पोक्सोचा गुन्हा दाखल केला आहे.