दक्षिण सोडा, नाही तर युती तोडा!

शिवसेनेचे पदाधिकारी भाजपला नेहमी ब्लॅकमेल करतात. निवडणुकीत गनिमीकावा करण्याचा प्रयत्न करतात. केंद्रीय मंत्री नितीन गडकरी यांच्या निवडणुकीतही सेनेने भाजपला खिंडीत गाठण्याचा प्रयत्न केला.

भाजप कोअर समितीची बैठक : सेनेवर रोखला बाण कमलेश वानखेडे - नागपूरशिवसेनेचे पदाधिकारी भाजपला नेहमी ब्लॅकमेल करतात. निवडणुकीत गनिमीकावा करण्याचा प्रयत्न करतात. केंद्रीय मंत्री नितीन गडकरी यांच्या निवडणुकीतही सेनेने भाजपला खिंडीत गाठण्याचा प्रयत्न केला. त्यामुळे एकदाची नागपुरात तरी शिवसेनेशी युती तोडा व दक्षिण नागपूरची जागा कोणत्याही परिस्थितीत भाजपसाठीच मागा, अशी टोकाची भूमिका भाजप कोअर समितीच्या बैठकीत मांडण्यात आली.भाजपच्या कोअर समितीची जिल्हानिहाय बैठक सोमवारी रविभवनात झाली. बैठकीला प्रदेशाध्यक्ष देवेंद्र फडणवीस, आ. कृष्णा खोपडे, आ. विकास कुंभारे, महापौर आ. अनिल सोले, महामंत्री सुधाकर कोहळे, प्रमोद पेंडके, राजेश बागडी, संजय भेंडे, श्रीकांत देशपांडे, डॉ. छोटू भोयर, कल्पना पांडे, अर्चना डेहनकर, कीर्तीदा अजमेरा, बंटी कुकडे आदी उपस्थित होते. या बैठकीत भाजपच्या रणनीतीवर चर्चा करण्यापेक्षा शिवसेनेवर असलेली नाराजी व्यक्त करण्यावर अधिक भर देण्यात आला. शहर अध्यक्ष आ. कृष्णा खोपडे यांनी याला सुरुवात केली. ते म्हणाले, शहरात भाजपची ताकद दाखविण्याची ही संधी आहे. शिवसेनेचे दबावतंत्र मोडित काढणे गरजेचे आहे. प्रत्येक निवडणुकीत शिवसेनेचे लोक त्रास देतात. लोकसभा निवडणुकीतही सेनेमुळे खूप मनस्ताप सहन करावा लागला, अशी भावना त्यांनी मांडली. खोपडे यांनी मांडलेल्या मताचा धागा धरत दक्षिणच्या इच्छुकांनी शिवसेनेवरच बाण रोखला. डॉ. छोटू भोयर यांनी आक्रमक भूमिका घेत दक्षिणची जागा सेनेला सोडण्यास विरोध केला. ते म्हणाले, गडकरींच्या निवडणुकीत दक्षिण नागपुरातील एका बैठकीत प्रदेशाध्यक्ष आ. फडणवीस व शहर अध्यक्ष आ. खोपडे उपस्थित होते. या बैठकीत या दोन्ही नेत्यांनी गडकरींना एक लाखावर मते मिळवून द्या, आम्ही दक्षिणची जागा मिळवून देतो, असे आश्वस्त केले होते. दक्षिणच्या भाजप कार्यकर्त्यांनी परिश्रम घेतले. एक लाखावर मतेही मिळाली. आता ते आश्वासन नेत्यांनी पूर्ण करावे, अशी भूमिका मांडली. शिवसेनेशी युती करायचीच असेल तर खोपडे यांनी आपली जागा सोडावी व दक्षिण सोडू नका, अशी आग्रही भूमिका भोयर यांनी मांडली. भोयर यांच्या मागणीला सुधाकर कोहळे यांनी पाठबळ दिले. दक्षिण नागपूर मिळत नसेल तर नागपुरात युती तोडा, अशी मागणी कोहळे यांनीही ताकदीने केली. बैठकीत शिवसेना विरोधी वातावरण तयार झाले असताना, भाजयुमोचे अध्यक्ष बंटी कुकडे यांनीही सेनेवर नेम साधला. ते म्हणाले, लोकसभा निवडणुकीत सेनेचे पदाधिकारी काँग्रेसच्या बुथवर बसले होते. उघडपणे भाजप विरोधात काम केले. आता आपण त्यांना मदत कशी करायची, असा सवाल त्यांनी केला. वातावरण तापलेले पाहून अशोक मेंढे यांनी संयमी भूमिका घेत उद्या बसपा काँग्रेससोबत गेली व आपली युती तुटली तर फटका बसेल, असे मत मांडले. महिला आघाडीच्या अध्यक्ष डॉ. कीर्तीदा अजमेरा यांनी किमान एका जागेवर तरी महिला उमेदवाराला संधी देण्याची मागणी केली.