पेट्रोल टाकून पेटविलेले प्रकरण
नागपूर : पेट्रोल टाकून जिवंत पेटविलेल्या संजय निवृत्तीनाथ खोब्रागडे यांची दुसर्‍या दिवशीही मृत्यूशी झुंज कायम आहे. राज्य मानवाधिकार आयोगाचे अध्यक्ष सी. एल. थूल, रोहयो मंत्री नितीन राऊत व भारिप बहुजन महासंघाचे नेते प्रकाश आंबेडकर यांनी आज सोमवारी मेडिकलला भेट देऊन खोब्रागडे यांच्या प्रकृतीची चौकशी केली. ९४ टक्के जळालेले खोब्रागडे यांना रविवारी मेडिकलच्या वॉर्ड क्र. १९ मधून वॉर्ड क्र. ४ मध्ये हलविण्यात आले. आज तिसर्‍या दिवशीही त्यांची प्रकृती चिंताजनक होती. डॉक्टरांनी सांगितले, खोब्रागडे सध्या उपचाराला साथ देत आहेत. मात्र, त्यांच्या मूत्र विसर्जनाचा अहवाल चिंताजनक आहे. त्यांचा पल्सरेट सध्या १०० ते १०४ वर स्थिरावला आहे. त्यांच्या आॅक्सिजनची मात्राही ९० ते ९५ पर्यंत स्थिरावली आहे. संजय यांच्या शरीराच्या कंबरेपासून वरचा भाग मोठ्या प्रमाणात भाजला आहे. त्यामुळे त्यांची त्वचा कडक झाली आहे. त्यांना श्वास घेण्यास त्रास होऊ नये म्हणून व्हेंटिलेटर उपलब्ध करून देण्यात आले आहे, परंतु तूर्तास त्याचा उपयोग नाही, असेही त्यांनी सांगितले. आज दिवसभरात अधिकारी आणि मंत्र्यांकडून खोब्रागडे यांच्या प्रकृतीची चौकशी करण्यात आली. यांच्यासोबतच भारिप बहुजन महासंघाचे मिलिंद पखाले, राष्ट्रवादीचे प्रकाश गजभिये, दलित पॅँथरचे प्रभारी राजेश लाडे आदींचा सहभाग होता. थूल यांनी गोंदिया जिल्ह्यातील प्रत्यक्ष घटनास्थळी देखील भेट देऊन वस्तुस्थितीची माहिती करून घेतल्याची माहिती आहे. मेडिकलचे प्रभारी अधिष्ठाता डॉ. तिरपुडे हे वेळोवेळी रुग्णाची माहिती घेत आहेत.(प्रतिनिधी)