जलालखेडा : स्थानिक गोपीचंद कॉटन इंडस्ट्रीजच्या जिनिंगला सोमवारी सकाळी ११.३० वाजताच्या सुमारस आग लागली. यात अंदाजे दोन कोटी रुपयांचे नुकसान झाले. ही आग जिनिंगमधील रेच्याजवळ झालेल्या शॉर्ट सर्किटमुळे लागल्याचे सूत्रांनी सांगितले. सुदैवाने यात प्राणहानी अथवा कुणीही जखमी झाले नाही. जलालखेडा-नरखेड मार्गावर जलालखेड्यापासून ४०० मीटर अंतरावर राजकुमार दयालचंद सतिजा रा. पांढुर्णा, जिल्हा छिंदवाडा (मध्य प्रदेश) यांच्या मालकीची गोपीचंद कॉटन इंडस्ट्रीज आहे. सोमवारी सकाळी या जिनिंगमध्ये नेहमीप्रमाणे काम सुरू असताना रेच्याजवळ शॉर्ट सर्किट झाले आणि ठिणगी उडाली. त्यामुळे रेच्याजवळ असलेल्या कापूस व रुईने पेट घेतला. पाहता-पाहता ही आग इतरत्र पसरली. या रेच्याजवळ सहा कामगार काम करीत होते. यावेळी राजकुमार सतिजा हे जिनिंगच्या कार्यालयात बसून होते. लगेच जलालखेडा पोलीस तसेच मोवाड, काटोल व वरूड नगर परिषदेच्या अग्निशमन दलाला सूचना देण्यात आली. दुपारी १२.१५ वाजताच्या सुमारास काटोल व त्यानंतर पाच मिनिटांनी वरुड नगर परिषदेचे अग्निशमन दल घटनास्थळी पोहोचले. दुपारी १.३० वाजताच्या सुमारास नागपूर महानगरपालिकेचे अग्निशमन वाहन घटनास्थळी दाखल झाले. दुपारी २.३० वाजेपर्यंत या आगीवर नियंत्रण मिळविण्यात अग्निशनम दलाला यश आले होते. सुरुवातीला जिनिंगच्या शेजारी असलेल्या कैलस मेहतकर यांच्या शेतातील विहिरीवरील मोटरपंप सुरू करून आग विझविण्याचा प्रयत्न करण्यात आला. घटनेच्यावेळी या जिनिंगमध्ये अंदाजे २० कामगार काम करीत होते. शिवाय, व्यापार्‍यांचे कापसाचे पाच मेटॅडोरही या जिनिंगच्या आवारात उभे होते. आग लागल्याचे कळताच जिनिंगमधील सर्व कर्मचारी व कामगार लगेच बाहेर पडले. शिवाय, कापसाचे मेटॅडोरही बाहेर काढण्यात आले. या आगीत अंदाजे एक कोटी १० लाख रुपये किमतीचा २२०० क्विंटल कापूस व रुईच्या गठाण, ६० लाख रुपये किमतीच्या मशीन व ३० लाख रुपयांचे इतर साहित्य खाक झाले असून, अंदाजे दोन कोटी रुपयांचे नुकसान झाल्याची माहिती राजकुमार सतिजा यांनी दिली. माहिती मिळाताच जलालखेड्याचे ठाणेदार (प्रभारी) जीवन भातकुले, तहसीलदार तुकाराम झिरवाड, नायब तहसीलदार धर्मेंद्र फुसाटे यांच्यासह नरखेड कृषी उत्पन्न बाजार समितीचे पदाधिकारी घटनास्थळी पोहोचले. मंडळ अधिकारी जंगले व तलाठी वानखेडे यांनी पंचनामा केला. (वार्ताहर)
कापसाच्या जिनिंगला आग
By admin | Updated: May 20, 2014 01:06 IST