नागपूर : मेकअप हा काही नवीन विषय नाही. खासकरून महिला वर्गासाठी असलेली ही मेकअपची प्रक्रिया आता पुरुषवर्गानेही स्वीकारलेली आहे. वैवाहिक आणि इतर कौटुंबिक सोहळ्यांसोबतच अनेक सार्वजनिक उत्सवांसाठी मेकअप अतिशय महत्त्वाचा मानला जातो. वर्तमानात तर हायप्रोफेशनमध्ये असलेल्या महिलांसाठी मेकअप हा रोजचाच विषय ठरलेला आहे. त्यामुळे आता घरोघरी ब्युटीपार्लर सुरू झाले आहे, असे म्हणणे वागवे ठरणार नाही. वर्तमानात एचडी मेकअपची चर्चा जोरात आहे आणि यासाठी मोठी रक्कम मोजावी लागत असल्याचे दिसून येेते.
नवरात्रात ‘एचडी’ मेकअपची मागणी
- नवरात्रोत्सव पार पडले असले तरी उत्सवांची भलमार आहे. शारदोत्सव अजूनही सुरूच आहे. सोबत कोजागिरी, दिवाळी आदी सण आहेतच. महिलावर्गांमध्ये नवरात्रापासून मेकअपच्या तयारीला अधिक वेग येतो. गरबा, दांडिया खेळताना नटूनथटून जाताना मेकअप करणे अनिवार्यच ठरते आणि त्यामुळे या काळात मेकअपची मागणी मोठ्या प्रमाणात असते. यात एचडी मेकअपकडे अनेकांचे प्राधान्य असल्याचे दिसून येते.
पाऊस वा घाम, ‘एचडी’ करेल काम
- एचडी मेकअपला सर्वसामान्य भाषेत सिंथेटिक मेकअप म्हटले जाते. सर्वसामान्य मेकअप घाम, पाऊस, आदींमुळे निघतो. मात्र, सिंथेटिक मेकअप घाम असो वा पाऊस, दीर्घकाळ जसाच्या तसा टिकून राहतो.
दोन हजारांपासून सुरुवात
- जेवढा चांगला मेकअप, तेवढाच खर्चही अधिक असतो. एचडी मेकअपसाठी दोन ते पाच हजार रुपयांपर्यंत खर्च येतो. अनेकदा त्याहीपेक्षा अधिक पैसे मोजावे लागत असल्याचे चित्र आहे.
घागरा, ज्वेलरीवर पाच हजारांपर्यंत खर्च
- नवरात्रोत्सवात गरबा, दांडियांसाठी महिलांनी खासकरून गुजराती घागरा, ज्वेलरीवर मोठ्या प्रमाणात खर्च केल्याचे दिसून आले. खास गरबा-दांडिया स्पेशल वस्त्र व अलंकार भाड्यानेही उपलब्ध होत होते.
कायम फ्रेश दिसण्यासाठी एचडी मेकअप
- प्रत्येक व्यक्ती स्वत:तच सुंदर असतात. मात्र, विशेष उत्सवासाठी नटणे ही परंपरा आहे. मेकअप हा त्यातील सगळ्यात महत्त्वाचा भाग असतो. कुठल्याही उत्सवात सहभागी होताना दीर्घकाळ फ्रेशनेस दिसावे, असे प्रत्येकाला वाटते. एचडी किंवा सिंथेटिक मेकअप ही इच्छा पूर्ण करतात.
- ज्योती शर्मा, ब्युटिशियन
.............