नागपूर : आमदार बच्चू कडू आणि रवी राणा यांच्यातील वाद आठवड्याभरापासून गाजतो आहे. बच्चू कडू यांनी त्यांच्याकडून वादाचा विषय संपल्याचा दावा केला आहे. मुख्यमंत्री आणि उपमुख्यमंत्र्यांकडे यापुढे वादाचा विषय काढणार नाही. आम्ही एक तारखेपर्यंत मागितलेले पुरावे आले नाही. त्यामुळे माझ्याकडून वादाचा विषय संपला आहे, तरी जर राणा तलवार घेऊन आले तर मी फुले घेऊन जाईन, असे प्रतिपादन कडू यांनी केले. डॉ. बाबासाहेब आंबेडकर नागपूर आंतरराष्ट्रीय विमानतळावर ते प्रसारमाध्यमांशी गुरुवारी बोलत होते.
अमरावती येथे आयोजित सभेत मी कुठेही वाईट वक्तव्य केले नाही. सार्वजनिक आणि सामान्य माणसांसाठी बोललो. रवी राणा दोन पावले मागे गेले तर मी चार पावले माघार घेईन, असेही म्हणालो. बच्चू कडू आता चौथ्या वर्गातील विद्यार्थी नाही. माझेही वय ५१ झाले आहे. राणा यांनीही दिलगिरी व्यक्त केली असून मीदेखील आभार मानले आहेत. आठ दिवस झाले तोच तो विषय सुरू आहे. आम्ही नाही थांबविला तर प्रसारमाध्यमांनी तो थांबवावा, असे कडू म्हणाले.