नागपूर : कोरोनाबाधितांसोबतच सक्रिय रुग्णसंख्येत वाढ झाली आहे. सोमवारी हा आकडा वाढून ६२६२वर गेला. मागील चार महिन्यांतील हा उच्चांक आहे. शिवाय, सप्टेंबरनंतर पहिल्यांदाच आज ९७५२ संशयित रुग्णांच्या चाचणीनेही नवा विक्रम गाठला. परिणामी, सोमवारी बाधितांची संख्या वाढून ७१० झाली. विशेष म्हणजे, या वर्षात मागील चार दिवसांतील सर्वाधिक रुग्णांची नोंद झाली. २८१६ नव्या रुग्णांची भर पडली. रुग्णांची एकूण संख्या १४३८४३ झाली असून, आठ रुग्णांच्या मृत्यूने मृतांची संख्या ४२८३वर गेली.
नागपूर जिल्ह्यात या महिन्यात दुसऱ्यांदा चाचण्यांची संख्या नऊ हजारांवर गेली. यापूर्वी २० फेब्रुवारी रोजी ९४४३ चाचण्या झाल्या होत्या. दोन्हीवेळी बाधितांच्या संख्येने ७०० चा टप्पा ओलांडला. सोमवारी झालेल्या चाचण्यांमध्ये ६२४९ आरटीपीसीआर, तर ३५०३ रॅपीड अँटिजेन चाचण्यांचा समावेश होता. आरटीपीसीारमधून ६६३, तर अँटिजेनमधून ४७ रुग्ण पॉझिटिव्ह आले. यात एम्सच्या प्रयोगशाळेतून ५६, मेडिकलच्या प्रयोगशाळेतून ६२, मेयोच्या प्रयोगशाळेतून ९७, नीरीच्या प्रयोगशाळेतून ४०, नागपूर विद्यापीठाच्या प्रयोगशाळेतून १००, तर खासगी लॅबमधून ३०८ रुग्ण बाधित असल्याचे निष्पन्न झाले. आतापर्यंत एकूण ११७६२०९ चाचण्या झाल्या.
-शहरात ६४१, तर ग्रामीणमध्ये ६७ नवे रुग्ण
सोमवारी पॉझिटिव्ह आलेल्या रुग्णांमध्ये शहरातील ६४१, ग्रामीणमधील ६७, तर जिल्हाबाहेरील दोन रुग्णांचा समावेश आहे. मृतांमध्ये शहरातील चार, ग्रामीणमधील दोन, तर जिल्ह्याबाहेरील दोन मृत्यू आहे. शहरात रुग्णांची एकूणसंख्या ११४८६९ व मृतांची संख्या २७७१, ग्रामीणमध्ये २८०४६ व मृतांची संख्या ७६६, तर जिल्ह्याबाहेर ९२८ व मृतांची संख्या ७४६ झाली आहे. आज कोरोनाच्या प्रादुर्भावातून ४३७ रुग्ण बरे झाले आहेत.
-असे वाढले सक्रिय रुग्ण
आॅक्टोबरनंतर पहिल्यांदाच २० डिसेंबर रोजी सक्रिय रुग्णांची संख्या ६१३० झाली होती. त्यानंतर सोमवारी बाधितांची संख्या ६२६२वर गेली आहे. विशेष म्हणजे, ११ फेब्रुवारी- ३५४७, १२ फेब्रुवारी- ३६३४, १३ फेब्रुवारी - ३८४९, १४ फेब्रुवारी- ४०४७, १५ फेब्रुवारी- ४२६१, १६ फेब्रुवारी- ४४०५, १७ फेब्रुवारी- ५१०५, १८ फेब्रुवारी- ५६१७, २० फेब्रुवारी- ५८३४, तर २१ फेब्रुवारी- ५९९७ झाली. सक्रिय रुग्णांच्या वाढत्या संख्येने शासकीयसह खासगी रुग्णालयातील खाटाही फुल्ल होऊ लागल्या आहेत.
-दैनिक चाचण्या : ९७५२
-बाधित रुग्ण : १४३८४३
_-बरे झालेले : १३३२९८
- उपचार घेत असलेले रुग्ण : ६२६२
- मृत्यू : ४२८३