नागपूर : उपमुख्यमंत्री देवेंद्र फडणवीस हे नागपुरचे कलंक असल्याचे वक्तव्य केल्याबद्दल भाजपच्या विधी आघाडीच्या पदाधिकाऱ्यांनी शिवसेनेचे पक्षप्रमुख उद्धव ठाकरे यांच्याविरोधात पोलिसांत तक्रार दाखल केली आहे. उद्धव ठाकरे यांनी जाणुनबुजून असे वक्तव्य करत समाजात तेढ निर्माण करत राज्यातील कायदा व सुव्यवस्था बिघडविण्याचा प्रयत्न केल्याचा आरोप या तक्रारीत करण्यात आला आहे.
विधी आघाडीचे अध्यक्ष ॲड.परिक्षीत मोहिते यांच्या नेतृत्वात नागपुरातील सिताबर्डी पोलीस ठाण्यात ही तक्रार दाखल करण्यात आली. फडणवीस यांचे नागपुरात व राज्यात मोठ्या प्रमाणात समर्थक आहे. ते राज्याचे उपमुख्यमंत्री असूनदेखील त्यांच्याबाबत वादग्रस्त वक्तव्य करून उद्धव ठाकरे यांनी सामाजिक तेढ निर्माण करण्याचा प्रयत्न केला आहे. ठाकरे यांनी वापरलेल्या अपमानास्पद व अभद्र भाषेमुळे भाजपच्या कार्यकर्त्यांसोबतच सामान्य नागरिकांमध्ये संतापाचे वातावरण आहे. समाजातील शांतता भंग करून अराजकता निर्माण करण्याचा ठाकरे यांचा हा प्रयत्न असून त्यांच्याविरोधात गुन्हा दाखल करत अटक करण्यात यावी, अशी मागणी या तक्रारपत्राद्वारे करण्यात आली आहे.