लाेकमत न्यूज नेटवर्क
नागपूर : अल्पवयीन मुलगी गावातील युवकाशी बाेलत असल्याच्या कारणावरुन चिडलेल्या बापाने पोटच्या मुलीशी गैरवर्तन केले. त्या मुलाशी पुन्हा बाेलली तर जीवे मारीन, अशी धमकीही त्याने दिली. ही घटना सोमवारी उघडकीस आली असून पीडित मुलीच्या तक्रारीनंतर पोलिसांनी नराधम बापाला अटकेत घेतले आहे.
बापाने केलेल्या गैरकृत्यानंतर पीडित मुलीला त्रास असह्य झाल्याने आईने तिला चिमूर येथील रुग्णालयात नेले. डाॅक्टरांनी विश्वासात घेत तिला विचारपूस केली असता, तिने संपूर्ण प्रकार सांगितला. व बापाचे किळसवाणे कृत्य उघडकीस आले.
बाप लेकीच्या नात्याला काळिमा फासणारी ही घटना ऑगस्ट महिन्यात भिवापूर पाेलीस ठाण्याच्या हद्दीतील वासी येथे घडली. ४५ वर्षीय आराेपी बाप खडसंगी, ता. चिमूर, जिल्हा चंद्रपूर येथील रहिवासी आहे. पीडिता ही १७ वर्षीय असून, ती ऑगस्टमध्ये तिच्या आजाेबाकडे वासी, ता. भिवापूर येथे आली हाेती. या काळात ती तिच्या गावातील मुलाशी बाेलत हाेती. याबाबतची माहिती मिळताच बापाचा राग अनावर झाला. त्याने मुलीला शिवीगाळ करीत लाथाबुक्क्यांनी मारहाण केली. त्यानंतर दाेरीने बांधून तिच्या शरीरावर तसेच गुप्तांगावर पेट्राेल मळले.
हा प्रकार महिनाभरापूर्वी घडला; मात्र, घटनेनंतर मुलीला असह्य त्रास सुरू झाला. डॉक्टरांनी विचारपूस केल्यानंतर तिने घडलेली घटना सांगितल्यानंतर डाॅक्टरांनी याबाबत चिमूर पाेलिसांना कळविले. घटनास्थळ भिवापूर पाेलीस ठाण्याच्या हद्दीत असल्याने तपास भिवापूर पाेलिसांकडे वर्ग करण्यात आला. याप्रकरणी भिवापूर पाेलिसांनी विविध कलमांन्वये गुन्हा दाखल करत आराेपीस अटक केली. या घटनेचा पुढील तपास सहायक पाेलीस निरीक्षक शरद भस्मे करीत आहेत.
एक दिवसाची पाेलीस काेठडी
आराेपीला अटक करण्यात आल्यानंतर भिवापूर येथील न्यायालयात हजर केले हाेते. न्यायालयाने त्याला एक दिवसाची पाेलीस काेठडी सुनावली, अशी माहिती ठाणेदार महेश भाेरटेकर यांनी दिली.