नागपूर : अभियांत्रिकीच्या एका विद्यार्थ्याने गळफास लावून आत्महत्या केली. एमआयडीसी पोलीस ठाण्याच्या हद्दीत ही घटना घडली. अनुराग गजानन पनपालिया (१९, धामणगाव, अमरावती) असे मृत विद्यार्थ्याचे नाव आहे.
अनुराग हा यशवंतराव चव्हाण अभियांत्रिकी महाविद्यालयात इलेक्ट्रॉनिक्समध्ये शिक्षण घेत होता. तो वानाडोंगरीतील मातोश्री नगरातील प्रकाश पाटील यांच्या घरी दुसऱ्या माळ्यावर भाड्याने राहायचा. १४ नोव्हेंबर रोजी रात्री साडेबारा वाजता तो खोलीत गेला. त्यानंतर दुपारी साडेतीन वाजेपर्यंत तो बाहेर आलाच नाही. त्याच्यासोबत त्याचा रूममध्ये प्रथमेश देखील असायचा. प्रथमेश परत आल्यानंतर अनुरागने दरवाजा उघडला नाही. त्यामुळे खिडकीतून आत डोकावून पाहिले असता, अनुराग गळफास घेतलेल्या अवस्थेत दिसला. त्याच्या मित्राने लगेच घरमालकाला ही माहिती दिली. पोलिस त्वरित घटनास्थळी पोहोचले व त्याला तातडीने इस्पितळात नेण्यात आले. परंतु डॉक्टरांनी त्याला मृत घोषित केले. त्याच्या कुटुंबीयांना लगेच माहिती देण्यात आली. त्याच्या आत्महत्येमुळे महाविद्यालयात शोककळा पसरली होती.