लोकमत न्यूज नेटवर्क
नागपूर : नागपूर विभागात एकूण ६५० राईस मिल्स आहेत. याचा उपयोग येथे तेल उद्योग वाढवण्यास होऊ शकतो. त्यामुळे मिल्स मालकांना विश्वासात घेऊन फोर्टी फ्राईड राईस व राईस ब्रॅन ऑईल’ तेल उद्योग उभारण्याबाबत सांगणे व यासाठी त्यांना आवश्यक ती मदत विभागामार्फत करावी, असे निर्देश केंद्र शासनाच्या अन्न व नागरी पुरवठा विभागाचे सचिव सुधांशू पांडे यांनी येथे दिले.
नागपुरात वर्धा रोडवरील एका खासगी हॉटेलमध्ये नागपूर विभागातील अन्न व पुरवठा विभागाच्या अधिकाऱ्यांची बैठक आयोजित करण्यात आली होती. या बैठकीत आढावा घेताना त्यांनी उपरोक्त निर्देश दिले. या बैठकीत विभागीय आयुक्त डॉ. संजीव कुमार, नागपूरचे जिल्हाधिकारी रवींद्र ठाकरे, चंद्रपूरचे जिल्हाधिकारी अजय गुल्हाणे, गडचिरोलीचे जिल्हाधिकारी दीपक सिंघला, गोंदियाचे जिल्हाधिकारी दीपककुमार मीना, भंडाऱ्याचे अतिरिक्त जिल्हाधिकारी घनश्याम भूगावकर, पुरवठा विभागाचे उपायुक्त रमेश आडे, भारतीय अन्न महामंडळ मुंबईचे महाव्यवस्थापक के.पी. आशा, नागपूरचे विभागीय व्यवस्थापक बी.एम. राऊत, गुण नियंत्रण विभागाचे सहायक महाप्रबंधक डी.आर. पासवान प्रामुख्याने उपस्थित होते.
यासोबतच नागपूरचे अन्न वितरण अधिकारी अनिल सवाई, जिल्हा पुरवठा अधिकारी भास्कर तायडे यांच्यासह सर्व जिल्ह्यांचे पुरवठा अधिकारी उपस्थित होते.
अंगणवाडी व शालेय पोषण आहाराअंतर्गत फोर्टीफाईड राईस पुरवण्यात यावे. तसेच केंद्र व राज्य शासनाच्या विविध योजनांची सांगड घालून गरिबांना सुलभतेने अन्नधान्य पाहोचवा, असे निर्देशही त्यांनी यावेळी दिले.