योगेश पांडे - नागपूरलोकमत न्यूज नेटवर्कनागपूर : मुंबई उच्च न्यायालयाच्या नागपूर खंडपीठाच्या इमारतीत मंगळवारी दुपारच्या सुमारास बॉम्ब ठेवल्याचा ई-मेल आल्यामुळे खळबळ उडाली. या ई-मेलनंतर बॉम्बची शोधाशोध करण्यासाठी सुरक्षायंत्रणांची धावपळ उडाली. सखोल शोधमोहीमेनंतर काहीच न सापडल्याने तो ई-मेल अफवाच असल्याचे स्पष्ट झाले व सुरक्षायंत्रणांतील अधिकारी-कर्मचाऱ्यांनी सुटकेचा नि:श्वास सोडला.
उच्च न्यायालयाच्या नागपूर खंडपीठाच्या इमारतीमध्ये बॉम्ब ठेवल्याचा ई-मेल आला. याची माहिती लगेच पोलिसांना देण्यात आली. त्यानंतर तातडीने तेथे बॉम्बशोधक व नाशक पथक तसेच इतर अधिकाऱ्यांनी धाव घेतली. इमारतीत शोध मोहीम सुरू करण्यात आली. अडीच ते तीन तास इमारतीचा कानाकोपरा तपासल्यावर ही अफवा असल्याचे स्पष्ट झाले. संबंधित ई-मेल नेमका कुणी केला याचा पोलिसांकडून शोध सुरू आहे. २४ मार्च रोजी जरीपटका येथील एका व्यक्तीने अशाच पद्धतीचा फोन करून सुरक्षायंत्रणांना कामाला लावले होते. विरोधात निकाल लागल्यामुळे त्याने हे कृत्य केले होते. दरम्यान, मुंबई उच्च न्यायालयाच्या औरंगाबाद खंडपीठालादेखील असाच ई-मेल मिळाला. तीदेखील अफवाच असल्याची बाब समोर आली.