लोकमत न्यूज नेटवर्कनागपूर : मुंबई उच्च न्यायालयाने उन्हाळी सुट्या रद्द करण्याचा निर्णय घेतल्यामुळे नागपूर जिल्हा व सत्र न्यायालयानेही स्वत:सह त्यांच्या अधिपत्याखालील सर्व न्यायालयांच्या उन्हाळी सुट्या रद्द केल्या आहेत. प्रधान जिल्हा व सत्र न्यायाधीश एस. जी. मेहरे यांनी बुधवारी यासंदर्भात परिपत्रक जारी केले.सुट्या रद्द करण्याचा निर्णय लॉकडाऊनवर अवलंबून आहे. सरकारने ३ मेनंतर व ७ जूनपूर्वी लॉकडाऊनचा आदेश मागे घेतला तरच, सुट्या रद्द करून जिल्हा व सत्र न्यायालय आणि त्या अधिपत्याखालील सर्व न्यायालयांमध्ये नियमित स्वरूपात कामकाज सुरू केले जाणार आहे. नियमित कामकाज सुरू झाल्यास कार्यालयीन कामकाजाची वेळ सकाळी १०.३० ते सायंकाळी ६ तर, न्यायालयीन कामकाजाची वेळ सकाळी ११ ते दुपारी २ आणि दुपारी २.३० ते सायंकाळी ५.३० अशी राहील. दुपारी २ ते २.३० ही वेळ विश्रांतीची राहील.