नागपूर : पॅरिसमध्ये पार पडत असलेल्या एअर शो दरम्यान, डसॉल्ट एव्हिएशन आणि रिलायन्स एरोस्पेस लिमिटेड यांच्यात फाल्कन २००० जेट विमानांच्या निर्मितीसाठी ऐतिहासिक करार करण्यात आला आहे. विशेष बाब म्हणजे ही विमाननिर्मिती प्रथमच फ्रान्सच्या बाहेर, थेट भारतात नागपूरच्या मिहान औद्योगिक परिसरात होणार आहे. महाराष्ट्राचे मुख्यमंत्री देवेंद्र फडणवीस यांनी या कराराचे स्वागत करत, तो ‘मेक इन इंडिया’ आणि ‘आत्मनिर्भर भारत’ उपक्रमांच्या दिशेने महत्त्वाचे पाऊल असल्याचे म्हटले आहे.
नागपूर हा सध्या सौर ऊर्जा आणि औद्योगिक क्षेत्रात झपाट्याने प्रगती करत असतानाच, या करारामुळे तो देशाच्या हवाई आणि संरक्षण उत्पादन क्षेत्रातील महत्त्वाचा केंद्रबिंदू ठरणार आहे. या करारानंतर भारत फाल्कन २००० जेटसारख्या प्रगत विमाने तयार करणाऱ्या देशांच्या यादीत अमेरिका, फ्रान्स, कॅनडा, ब्राझील यांच्यासोबत सामील होणार आहे.
डसॉल्ट रिलायन्स एरोस्पेस लिमिटेड (DRAL) हे नागपूरमधील उत्पादन केंद्र ‘सेंटर ऑफ एक्सलन्स’ म्हणून विकसित करण्यात येणार आहे. फाल्कन २००० व्यतिरिक्त फाल्कन 8X आणि 6X विमानांचे असेम्ब्ली कार्यही याच ठिकाणी पार पडेल. २०२८ पर्यंत नागपुरात पहिले ‘मेड इन इंडिया’ फाल्कन जेट तयार होईल, अशी माहिती अधिकृत सूत्रांनी दिली.
या करारामुळे हजारो तंत्रज्ञ आणि अभियंत्यांना रोजगाराच्या नव्या संधी उपलब्ध होणार असून, यामुळे नागपूर औद्योगिकदृष्ट्या आणखी सक्षम होईल. डसॉल्ट एव्हिएशन ही जगभरात ओळखली जाणारी विमाननिर्माता कंपनी असून, त्यांनी आतापर्यंत १०,००० हून अधिक नागरी आणि लष्करी विमाने तयार केली आहेत आणि सुमारे ९० देशांमध्ये त्यांचा पुरवठा केला आहे. राफेल लढाऊ विमानामुळे चर्चेत असलेल्या डसॉल्टकडून आता नागपूरसारख्या शहरात अशी गुंतवणूक होणे, हे निश्चितच गौरवास्पद आहे.
मुख्यमंत्री फडणवीस यांनी या संधीचे स्वागत करताना सांगितले की, “नागपुरात संरक्षण उत्पादनासाठी आवश्यक पायाभूत सुविधा निर्माण करण्यात आल्या आहेत. हा करार त्या दिशेने एक मैलाचा दगड ठरेल.”