गोंदिया जिल्ह्यातील थरारक घटना : सहा जणांचे निर्दयी कृत्य
गोंदिया : गावातील काही जणांनी एका दलित इसमाला पेट्रोल टाकून जिवंत पेटविले. गोंदिया जिल्ह्यातील कवलेवाडा (ता. गोरेगाव) येथे शुक्रवारी मध्यरात्री ही घटना घडली. संजय निवृत्तीनाथ खोब्रागडे (४६) असे पीडिताचे नाव असून, अत्यवस्थ अवस्थेत त्याच्यावर नागपुरातील मेडिकलमध्ये उपचार सुरू आहेत. गंगाझरी पोलीस ठाण्यांतर्गत येणार्या कवलेवाडा गावातील काही व्यक्तींसोबत खोब्रागडेचा जागेच्या कारणावरून वाद होता. ग्रामसभा व सरपंचाकडेही हे प्रकरण गेले होते. तिढा सुटण्याऐवजी वाढतच गेल्यामुळे खोब्रागडेसोबत ‘त्या‘ व्यक्तींचे भांडणही झाले होते. या पार्श्वभूमीवर, खोब्रागडे नेहमीप्रमाणे शुक्रवारी रात्री आपल्या घराच्या आवारात झोपला. पहाटे २.३० च्या सुमारास त्याच्या किंकाळ्या ऐकून पत्नी जागी झाली. खोब्रागडेला आगीच्या ज्वाळांनी घेरल्याचे पाहून त्याच्या पत्नीने लगेच पाणी ओतून त्याला कसेबसे विझवले. दरम्यान, आरडाओरड ऐकून शेजारची मंडळी जागी झाली. त्यांनी खोब्रागडेला उपचारासाठी केटीएस जिल्हा सामान्य रुग्णालयात दाखल केले. या घटनेची माहिती कळताच गंगाझरी पोलीस रुग्णालयात पोहचले. घटनेचे गांभीर्य लक्षात घेऊन पोलिसांसमोर गोंदियाचे नायब तहसीलदार व्ही.आर. फंड यांनी खोब्रागडेचे बयान घेतले. झोपेत असताना आरोपींनी पेट्रोल ओतले आणि काही कळायच्या आतच त्यांनी कापड गुंडाळलेली जळती काडी अंगावर फेकून पेटविल्याचे त्याने सांगितले. खोब्रागडेने संशयित म्हणून गावातील काही लोकांची नावे सांगितली. त्याच्या बयानात संशयित म्हणून रुषीपाल टेंभरे (४६), माधुरी टेंभरे, भाऊलाल हरिणखेडे (४७), श्रीप्रकाश रहांगडाले (५१), पुनाजी ठाकरे (५७) आणि हेमंत ठाकरे (२९) यांची नावे असल्याचे पोलीस सांगतात. त्याच्या पत्नीने आपण झोपेत असल्यामुळे आरोपींबाबत आपल्याला काही माहीत नसल्याचे पोलिसांना सांगितले. या संदर्भात माहिती जाणून घेण्यासाठी सहायक पोलीस निरीक्षक अनिल पाटील यांच्याशी संपर्क साधला असता, त्यांनी या प्रकरणी भादंविच्या कलम ३०७, १४३, १४७, १४८ अन्वये गुन्हा दाखल करून माधुरी टेंभरे वगळता सर्वांना अटक केल्याचे सांगितले. या थरारक घटनेमुळे परिसरात प्रचंड खळबळ निर्माण झाली असून, जिल्हा पोलीस अधीक्षक दिलीप झळके यांच्या मार्गदर्शनाखाली उपविभागीय पोलीस अधिकारी दीपक गिºहे प्रकरणाचा तपास करीत आहेत. (तालुका प्रतिनिधी)