नकली सोने विकणारी टोळी अडकली

जुनाट इमारतीत राजा-महाराजांच्या दागिन्यांचे हंडे (गुप्तधन) सापडल्याची बतावणी करून नकली सोने विकणारी टोळी एका तरुणाच्या सतर्कतेमुळे पोलिसांच्या हाती लागली.

आंतरराज्यीय जाळे दोघांना अटकसाथीदार पसारनागपूर : जुनाट इमारतीत राजा-महाराजांच्या दागिन्यांचे हंडे (गुप्तधन) सापडल्याची बतावणी करून नकली सोने विकणारी टोळी एका तरुणाच्या सतर्कतेमुळे पोलिसांच्या हाती लागली. शंकर मोहन बघेल (वय १९, रा. कपिलनगर, हुडकेश्वर) आणि किसन कन्हैयालाल सोलंकी (वय ४३, रा. साईनगर, हुडकेश्वर) अशी या टोळीतील आरोपींची नावे आहेत. पोलिसांनी पकडल्याचे पाहून त्यांचे साथीदार पळून गेल्याचा अंदाज आहे.शेख वसिम शेख हनिफ (वय ३०) हा अजनीतील कावरापेठमध्ये राहतो. शुक्रवारी दुपारी त्याच्याकडे दोन व्यक्ती आल्या. त्यांनी अनाथ आश्रमासाठी वर्गणी मागितली. नंतर प्यायला पाणी मागितले. चर्चा करताना ‘आम्ही अनाथ मुलांसाठी काम करतो. मिळेल त्या जागी दिवस काढतो. अशाच प्रकारे एक दिवस एका जुनाट पडक्या (खंडहर) इमारतीत जेवण तयार करीत असताना अचानक आम्हाला तेथे जमिनीत एक हंडासापडला. त्यात प्राचीन काळातील राजे-महाराजे ज्याप्रमाणे शरीरावर सोन्याचे दागिने घालायचे, तसेच सोन्याचे हार आम्हाला सापडले’, अशी आरोपींनी बतावणी केली. हे सोने विकायचे आहे. मात्र, भीतीमुळे कुणाला विकावे ते आम्हाला कळत नसल्याचे आरोपी म्हणाले. त्यांनी लाखो रुपयांचे सोने वसिमला ७० हजारात देण्याची तयारी दाखवली. सोने खरे आहे की खोटे, ते तपासण्यासाठी मागितले असता आरोपीने दागिन्याचा एक तुकडा वसिमला दिला. सराफाकडे तो तपासला असता ‘सोने खरे’ असल्याचे स्पष्ट झाले. त्यामुळे वसिमने आरोपींकडून सोन्याचे हार खरेदी करण्याची तयारी दर्शविली. पैसे घेऊन सोने देण्याचा व्यवहार शुक्रवारी रात्री करण्याचे ठरले. त्यामुळे वसिमचा मोबाईल नंबर घेऊन आरोपी निघून गेले. (प्रतिनिधी)अनेकांना गंडाप्राथमिक चौकशीतच या दोघांनी अशा प्रकारे महाराष्ट्र, मध्यप्रदेश, आंध्रप्रदेशात अनेकांना गंडा घातल्याची कबुली दिली. या दोघांसोबत मोठी टोळी असावी, असा पोलिसांचा कयास आहे. पोलीस त्यांचा शोध घेत आहेत. गुन्हेशाखेचे अतिरिक्त आयुक्त श्रीकांत तरवडे, डीसीपी रंजन शर्मा, एसीपी नीलेश राऊत यांच्या मार्गदर्शनाखाली पीआय चंद्रशेखर ढोले, एपीआय अमोल काळे, पीएसआय बाबाराव गोस्वामी, एएसआय सुधीर बघेल, हवालदार सुरेश हिंगणेकर, शत्रुघ्न कडू, नायक विजय दासरवार, अतुल दवंडे यांनी ही कामगिरी बजावली.शंका खरी ठरलीजवळपास एक किलो सोने अवघ्या ७० हजारात कुणी कसे विकू शकतात, असा प्रश्न वसिमला पडला. त्यामुळे त्याच्या मनात शंकेची पाल चुकचुकली. आरोपीचे वर्तन संशयास्पद वाटल्याने त्याने गुन्हेशाखेच्या पथकाशी संपर्क साधला. दरम्यान, ठरल्याप्रमाणे आरोपी बघेलचा वसिमला फोन आला. त्याने मेडिकल परिसरातील डेंटल हॉस्पिटलजवळ रात्री ७ वाजता बोलवले. वसिम तेथे गेला.बाजूला गुन्हेशाखेचे पथकही होते. बघेल आणि सोलंकीने जवळचे नकली सोन्याचे दागिने काढताच पोलिसांनी त्यांच्यावर झडप घालून त्यांना जेरबंद केले.