लॉटरी बक्षिसाच्या नावे फसवल्याचे प्रकरण : मुदतबाह्य वास्तव्यासाठी शिक्षा, भारतातून हद्दपारीचा आदेश नागपूर : भारतात मुदतबाह्य वास्तव्य केल्याप्रकरणी मुख्य न्यायदंडाधिकारी डी. पी. रागीट यांच्या न्यायालयाने दोन विदेशी नागरिकांपैकी एकाला एक वर्ष सश्रम कारावास आणि सहा हजार रुपये दंडाची शिक्षा सुनावली. शिक्षेची मुदत संपल्यानंतर या आरोपीला भारत देशातून हद्दपार करण्यात यावे, असेही न्यायालयाने आपल्या आदेशात नमूद केले आहे. अन्य दुसऱ्या आरोपीची पुरावे सिद्ध न झाल्याने निर्दोष सुटका केली. एरिक डेव्हिड टेन्डो, असे शिक्षा झालेल्या आरोपीचे नाव असून तो कॅमेरून देशाच्या डौऊला येथील रहिवासी आहे. याकुबा अली ट्रावरे, असे निर्दोष सुटलेल्या आरोपीचे नाव असून तो माली देशाच्या बामाको येथील रहिवासी आहे. एरिकला विदेशी नागरिक अधिनियम १९४६ च्या कलम १४ (ए)(बी)(सी) अंतर्गत एक वर्ष सश्रम कारावास आणि तीन हजार रुपये दंडाची शिक्षा सुनावण्यात आली. तसेच पारपत्र (भारतात प्रवेश) अधिनियम १९२० कलम ३ (२)(ए), पारपत्र (भारतात प्रवेश) नियमावली १९५० च्या नियम ६ (ए) अंतर्गत एक वर्ष सश्रम कारावास आणि तीन हजार रुपये दंडाची शिक्षा सुनावण्यात आली. आरोपीला या दोन्ही शिक्षा एकत्र भोगाव्या लागतील. आरोपीची शिक्षेची मुदत संपल्यानंतर त्याला भारत देशातून हद्दपार करण्यात यावे, असेही आदेशात नमूद करण्यात आले आहे. आरोपींना पकडले होते रंगेहाथ नागपूर : टिळकनगर येथील रहिवासी प्रकाश भय्याजी बडगे यांच्या तक्रारीवरून अंबाझरी पोलिसांनी १३ सप्टेंबर २०१५ रोजी भादंविच्या ४२०, ४६५, ३४, माहिती तंत्रज्ञान कायद्याच्या ६६ (डी), विदेशी नागरिक अधिनियम १९४६ च्या कलम १४ (ए) (बी)(सी), पारपत्र (भारतात प्रवेश) अधिनियम १९२० च्या कलम ३(२)(ए) आणि पारपत्र (भारतात प्रवेश) नियमावली १९५० च्या नियम ६ (ए) अन्वये गुन्हे दाखल करून याकुबा आणि एरिक या दोघांना अटक केली होती. या गुन्ह्यातील सुमीत कपूर, मार्क फिलीप्स, कवलदीप हरविंदर सिंग रा. गुडगाव आणि दोन महिला के. के. फेलिक्स आणि थांगनेनम माटे रा. मणिपूर, असे पाच आरोपी पोलिसांना अखेरपर्यंत गवसलेच नाहीत. पोलीस निरीक्षक एस.एम. गोराडे यांनी या प्रकरणाचा तपास केला होता. प्रकरण असे की, आरोपी याकुबा हा बनावट व्हिसाच्या आधारे बेकायदेशीररीत्या भारतात वास्तव्य करताना आढळून आला होता. तो ३१ डिसेंबर २०१४ रोजी ट्युरिट व्हिसावर आला होता. तो ३० डिसेंबर २०१५ पर्यंत वैध होता. हा व्हिसा तीन महिने मुदतीचा असतो, मुदतवाढ मिळत नाही. आरोपी एरिक हा दुसऱ्या व्यक्तीचा पासपोर्ट स्वत:चा म्हणून वापरत होता. त्याच्याजवळील बिझिनेस व्हिसाही बनावट होता. त्याने ३० एप्रिल २०१४ रोजी भारतात प्रवेश घेतला होता. त्याची मुदत २८ जून २०१४ रोजीच संपली होती आणि तो कुलू या नावाने वावरत होता. या दोन्ही आरोपींनी प्रकाश बडगे यांना शेवरलेट मोटार कंपनीचे खोटे ई-मेल पाठवून एक लाख अमेरिकन डॉलरचे बक्षीस लागल्याचे आमिष दाखवले होते. आरोपी आणि साथीदारांनी त्यांच्याकडून ९० हजार ५०० रुपये प्राप्त केले होते. या दोन आरोपींनी गोदरेजच्या लॉकरभर काळ्या कागदाचे बंडल्स अमेरिकन डॉलर आहेत, असे सांगून आणले होते. पुन्हा त्यांनी ५६ हजाराची मागणी केली होती. बडगे यांच्या सूचनेवरून या दोघांना रंगेहात अटक करण्यात आली होती. न्यायालयात एकूण सात साक्षीदार तपासण्यात आले. उपलब्ध पुराव्यावरून न्यायालयाने एकाला शिक्षा तर दुसऱ्याची निर्दोष सुटका केली. न्यायालयात सरकारच्या वतीने वरिष्ठ सरकारी वकील ए. पी. सिंग तर आरोपींच्या वतीने अ‍ॅड. पी. पी. कोतवाल, अ‍ॅड. शेख सबाह यांनी काम पाहिले. नायक पोलीस शिपाई नितीन तिवारी यांनी न्यायालयीन कामात सहकार्य केले. (प्रतिनिधी)
कॅमेरून नागरिकाला कारावास
By admin | Updated: August 17, 2016 02:12 IST