मेडिकलमध्ये खळबळ : अतिदक्षता विभागात दिली जात होती ‘व्हीआयपी ट्रीटमेंट’नागपूर : अडीच लाखांच्या लाचप्रकरणी लाचलुचपत प्रतिबंधक कायद्याचे विशेष न्यायाधीश टी. एम. लालवानी यांच्या न्यायालयाने आज आरोपी सदर पोलीस ठाण्याचे निरीक्षक अरुण माळी यांना न्यायालयीन कोठडी सुनावून मध्यवर्ती कारागृहाकडे रवानगी केली. शनिवारी लाचलुचपत प्रतिबंधक विभागाच्या पथकाने मनोहर निमजे याला पोलीस निरीक्षक अरुण माळी यांच्यावतीने अडीच लाखांची लाच घेताना रंगेहात अटक केली होती. रविवारी या दोघांनाही पोलीस कोठडी रिमांडसाठी न्यायालयात हजर करण्यात आले होते. न्यायालयाने दोघांनाही दोन दिवस पोलीस कोठडीत ठेवण्याचा आदेश दिला होता. पोलीस कोठडी रिमांडमध्ये असताना, माळी यांनी छातीमध्ये दुखत असल्याची तक्रार केली होती. त्यामुळे त्यांना सोमवारी मेडिकल कॉलेज इस्पितळाच्या वैद्यकीय अधिकाऱ्यांनी अतिदक्षता विभागात दाखल करून घेतले होते. माळी यांना ‘व्हीआयपी ट्रीटमेंट’दिली जात असल्याच्या लोकमतच्या वृत्ताने खळबळ उडून बुधवारी माळी यांना इस्पितळातून सुटी देण्यात आली. लागलीच या प्रकरणाचे तपास अधिकारी पोलीस उपअधीक्षक चंद्रशेखर बहादुरे यांनी माळी यांना न्यायालयात हजर केले. न्यायालयाने न्यायालयीन कोठडी सुनावून त्यांची कारागृहाकडे रवानगी केली. माळी यांच्या वकिलांनी न्यायालयात जामीन अर्ज दाखल केला असून, त्यावर गुरुवारी सुनावणी होणार आहे. दरम्यान, न्यायालय आवारातील हल्ल्याच्या घटनेच्या वेळी माळी यांनी घातलेले कपडे एसीबीने ताब्यात घेतलेले आहे. मेडिकलच्या अतिदक्षता विभागात गरीब रुग्णांना अनेकवेळा केवळ औपचारिकता म्हणून दाखल केले जाते. उपचारासाठी डॉक्टरांची गयावया करावी लागते, मात्र त्याचवेळी विशेष काहीही न झालेल्या लाचखोर अरुण माळीला अतिदक्षता विभागाच्या वातानुकूलित खोलीत ठेवण्यात आले होते.माळी आपल्याला मधुमेह असल्याचे सांगत असताना, तो घेत असलेल्या औषधाचे त्याला नाव माहीत नव्हते, हे विशेष. औषधवैद्यकशास्त्र (मेडिसीन) विभागाचा अंतर्गत वॉर्ड क्र . २४ हा अतिदक्षता विभाग येतो. मेडिकलमधील हा विभाग सर्वात व्यस्त आहे. (प्रतिनिधी)
लाचखोर अरुण माळी कारागृहात
By admin | Updated: June 12, 2014 01:24 IST