लोकमत न्यूज नेटवर्कनागपूर : शिक्षिका आणि व्यापाऱ्यातील प्रेमकहानी युरोप तसेच दुबईपर्यंत पोहचली. नागपूर अन् भारतातच नव्हे तर या दोघांनी देश-विदेशात सैरसपाटा करून मौजमजा केली. तब्बल चार वर्षे ते पती-पत्नीसारखे एकमेकांवर हक्क दाखवत सोबत राहिले. युवकाने युरोप आणि दुबई या देशात नेऊन बलात्कार केला. सहा महिन्यांपूर्वी त्यांच्यात वाद सुरू झाला अन् अखेर या प्रकरणात प्रतापनगर पोलिसांनी बलात्काराचा गुन्हा दाखल केला. जेठानंद ऊर्फ जय सुरेशकुमार नारायणी (वय ३२, सिंधी कॉलनी, खामला) असे आरोपी प्रियकराचे नाव आहे.तक्रार करणारी २६ वर्षीय तरुणी दुबईतील एका इंडियन स्कूलमध्ये नोकरीवर होती. नागपूरमध्ये असताना २०१४ च्या प्रारंभी ती खामल्यातील जेठानंदच्या गिफ्ट अँड आर्टिकल्स दुकानात आली होती. तेथे तिने महागडे गिफ्ट घेतल्यामुळे जेठानंदने बिल बनविताना तिचा मोबाईल नंबर घेतला. काही दिवसांनंतर जेठानंदने तिला फोन करून ‘स्पेशल ग्राहक' म्हणून तुमची निवड झाल्याचे तसेच तुम्हाला गिफ्ट लागल्याचा फोन करून आपल्या दुकानात बोलविले. यावेळी जेठानंदने तिला सरप्राईज गिफ्ट म्हणून महागडी घड्याळ दिली. तेव्हापासून या दोघांमध्ये मैत्री झाली. ते रोज एकमेकांना फोन आणि मॅसेज करू लागले. जेठानंदचे वाडीलाही कपड्याचे दुकान आहे. त्याने एकदा तिला कपड्याच्या दुकानात नेऊन पाहिजे तशी खरेदी करण्यास सांगितले. त्यानंतर तिच्याकडून बिल घेण्यास नकार दिला. त्याचा तामझाम पाहून तरुणी त्याच्यावर भाळली. त्याने तिला प्रपोज करताच तिने होकार दिला. दरम्यान, २०१७ मध्ये हे दोघे दुबई आणि त्यानंतर युरोपमध्ये गेले. तेथे या दोघांनी पती-पत्नीसारखे एकमेकांसोबत दिवस घालविले. त्या एकांत क्षणाचे फोटो जेठानंदने मोबाईलमध्ये काढून ठेवले. परत आल्यानंतर नागपुरातील तारांकित हॉटेलमध्येही त्याने तिच्याशी अनेकदा शरीरसंबंध प्रस्थापित केले.अन् खटका उडाला१२ फेब्रुवारी २०१४ ते १६ ऑक्टोबर २०१८ पर्यंत त्यांच्यात सर्व सुरळीत होते. कारण विचारले असता त्याने तिच्या चारित्र्यावर संशय घेतला आणि तू खालच्या जातीची आहे, असे म्हणत तिला लग्नास नकार दिला. याबाबत पोलिसांकडे तक्रार केल्यास ठार मारेन, अशी धमकीही दिली. वारंवार समजावूनही तो ऐकत नसल्याचे पाहून तरुणीने प्रतापनगर ठाण्यात तक्रार नोंदवली. पोलिसांनी आरोपी जेठानंद नारायणी याच्याविरुद्ध बलात्कार करून धमकी देण्याच्या आरोपाखाली तसेच अनुसूचित जाती जमाती प्रतिबंधक कायद्यानुसार गुन्हा दाखल केला.