नागपूर : एरवी रुग्णवाहिका ही लाइफलाइन ठरते, मात्र नागपुरातील एका हातठेला चालकासाठी रुग्णवाहिका हीच डेथलाईन ठरली. भरधाव रुग्णवाहिकेच्या धडकेत एका व्यक्तीचा मृत्यू झाला. शेख सलीम शेख रमजान पटेल (५९, मोठा ताजबागजवळ) असे मृताचे नाव आहे. सक्करदरा पोलीस ठाण्याच्या हद्दीत हा अपघात झाला.
शेख सलीम शेख रमजान पटेल हे सोमवारी सायंकाळी साडेसहा वाजता शीतलामाता चौकाजवळील रस्त्याने हातठेला नेत होते. त्याच वेळी एमएच ४० बीएल ९९५८ ही रुग्णवाहिका भरधाव आली. चालक संदेश सुरेश सुटे (२१, तलमले ले आऊट, बुटीबोरी) याचे रुग्णवाहिकेवरील नियंत्रण सुटले व त्याने थेट शेख सलीम यांना धडक दिली. वेग जास्त असल्याने रुग्णवाहिकेने आणखी एका ५० वर्षांच्या व्यक्तीलादेखील धडक दिली. शेख सलीम यात गंभीर जखमी झाले. त्यांना उपचारासाठी मेडिकल इस्पितळात नेले असता उपचारादरम्यान त्यांचा मृत्यू झाला. ऐन रमजानच्या महिन्यात त्यांचा मृत्यू झाल्याने कुटुंबीयांना मोठा धक्का बसला. त्यांच्या दुर्दैवी मृत्यूबाबत परिसरात हळहळ व्यक्त करण्यात येत आहे. त्यांचा मुलगा शेख इर्शाद शेख सलीम याच्या तक्रारीवरून सक्करदरा पोलीस ठाण्यात चालक संदेशविरोधात गुन्हा दाखल करण्यात आला असून त्याला अटक करण्यात आली आहे.