याहीवेळी ‘फिल गुड’

भाजपाचा बालेकिल्ला असलेल्या दक्षिण-पश्चिम नागपुरात यावेळी ‘फिल गुड’ अशी स्थिती आहे.

जितेंद्र ढवळे नागपूर भाजपाचा बालेकिल्ला असलेल्या दक्षिण-पश्चिम नागपुरात यावेळी ‘फिल गुड’ अशी स्थिती आहे. भाजपाचे प्रदेशाध्यक्ष आ.देवेंद्र फडणवीस येथे मैदानात उतरतील. राज्यात प्रचाराची धुरा असतानाही दक्षिण-पश्चिमध्ये फडणवीस यांनी लोकसभेत नितीन गडकरी यांना ६२ हजार ७२३ मतांची लीड दिली. गडकरी यांना १ लाख ६७२५ मते मिळाली तर काँग्रेसचे विलास मुत्तेमवार यांना केवळ ४४ हजार मतांवर थांबावे लागले. काँग्रसचे येथे पानिपत झाले. फडणवीस यांचा दावा असल्याने येथे भाजपमध्ये कोणाचाही दावा असणार नाही. तशी शिस्त या मतदार संघातील भाजप कार्यकर्ते आणि पदाधिकाऱ्यात आहे. काँग्रेसमध्ये यावेळी दक्षिण- पश्चिममध्ये कोण लढणार, हे अद्याप स्पष्ट नाही. गेल्यावेळी दक्षिण-पश्चिममध्ये नशीब अजमाविणारे काँग्रेसचे शहराध्यक्ष विकास ठाकरे यांनी यावेळी पश्चिममध्ये मोर्चा वळविला आहे. गेल्यावेळी ठाकरे यांना येथे ६१, ४८३ मते मिळाली होती. लोकसभा प्रचारात ठाकरे यांनी या मतदार संघात काँग्रेसच्या वतीने लीड घेतला होता. नगरसेवक प्रफुल्ल गुडधे यांनी येथे काँग्रेसच्या वतीने दावा केला आहे. तशी इच्छाही त्यांनी शहर आणि प्रदेश काँग्रेसकडे व्यक्त केली आहे. गुडधे यांचे दक्षिण-पश्चिमशी कौटुंबिक नाते आहे ! इकडे नगरसेविका अ‍ॅड.रेखा बारहाते यांचाही काँग्रेसच्या वतीने येथे दावा राहील. या मतदारसंघात मोठ्या प्रमाणात दलिस्त वस्त्यांचा समावेश आहे. गेल्यावेळी रिडालोसच्या वतीने जयदीप कवाडे यांनी येथे निवडणूक लढविली होती. त्यांना १ हजार ४३८ मते मिळाली होती. भाजपने मात्र येथे लोकसभेत महायुतीतील घटक पक्ष रिपाइं (आठवले) ची मदत कॅश केली. गतवेळी भारिपचे राजू लोखंडे यांनी १० हजार ५३३ मते मिळवीत तिसरा क्रमांक गाठला होता. आम आदमी पार्टीने अनपेक्षितपणे या मतदारसंघात मुसंडी मारली. आम आदमी भाजपची मते घेणार असा अंदाज होता. त्यामुळे या पक्षाला काँग्रेसनेही गांभीर्याने घेतले नाही. मात्र प्रत्यक्षात काँग्रेसलाच त्याचा फटका बसला. या मतदार संघात मनसेने तगडा उमेदवार देण्याची तयारी चालविली आहे. यात मनसेचे प्रदेश उपाध्यक्ष हेमंत गडकरी यांचा दावा आहे. श्रेष्ठींच्या आदेशाची त्यांना प्रतीक्षा आहे. मतदार संघातील स्थानिक प्रश्न, समस्या याकडे मतदारांचे लक्ष वेधण्यासाठी मनसेची यंत्रणा प्रयत्नशील आहे.