गणेश हूड नागपूर : जिल्हा परिषदेतर्फे सावनेर येथील कृषि उत्पन्न बाजार समितीमध्ये जिल्हास्तरीय कृषि-पशुपक्षी मेळावा व प्रदर्शनीचे उद्या १४ जून रोजी आयोजन करण्यात आले आहे. या प्रर्दशनी मध्ये शेतकऱ्यांना बि-बियाणे, किटकनाशके, कृषि अभियांत्रीकीकरण अवजारे, सोलार कुपंन, सोलार पंप, पाईप, मोटर पंप, यासह विविध विषयावर कृषि तज्ज्ञ मार्गदर्शन करणार आहेत.
मेळावा व प्रदर्शनीमुळे ग्रामीण भागातील जनतेला वेगवेगळया जातीचे पशुपक्षी पालनाबाबत माहिती व पशुपक्षी पालन प्रशिक्षण देण्यात येणार आहे. शेतक-यांनी पारंपारीक शेती सोबतच आधुनिक तंत्रज्ञानाची कास धरुन शेती करण्याबाबतची संकल्पना ठेवण्यात आली आहे. त्यानुसार प्रदर्शनामध्ये विविध प्रात्याक्षिक, प्रारूप व शासकीय योजनांची माहिती सादर केली जाणार आहे. या प्रदशर्नी मध्ये विविध जातींची जनावरे, शेतीसाठी उपयुक्त साहित्य व विविध उत्पादने असणारे जवळपास २०० स्टॉल राहणार असल्याची माहिती जिल्हा परिषदेच्या अध्यक्ष मुक्ता कोकड्डे व उपाध्यक्ष कुंदा राऊत यांनी दिली.
महिलांनी तयार केलेल्या उत्पादनला या ठिकाणी थेट बाजारपेठ मिळवुन देण्याकरीता जिल्हा परिषद महिला बचत गटांचे स्टॉल लावण्यात येणार आहे. याप्रदर्शनीचा मोठया प्रमाणात फायदा शेतक-यांना होणार आहे. प्रदर्शनीचा व मेळाव्याचा लाभ ग्रामीण भागातील सर्व शेतकरी व नागरीकांनी घ्यावा असे आवाहन करण्यात आले आहे.