नागपूर : रामदासपेठेत सुरू असलेल्या ऑनलाइन सेक्स रॅकेटचा गुरुवारी रात्री सीताबर्डी पोलिसांनी भंडाफोड केला होता. पोलिसांनी तेथून दोन तरुणींची सुटका केल्यानंतर सोनेगाव येथेदेखील त्याच रॅकेटअंतर्गत देहव्यापार सुरू असल्याची बाब समोर आली. पोलिसांनी तेथेदेखील धाड टाकून एका तरुणीची सुटका केली. या रॅकेटचा मुख्य सूत्रधार फरारच आहे.
रामदासपेठमधील सेंट्रल बाजार मार्गाजवळ ऑक्टेव्ह पार्कलँड स्वीट्स येथे हे रॅकेट सुरू होते. समीर नावाच्या नागपूरबाहेरील सूत्रधाराने उत्तर प्रदेशातील गौतम बुद्धनगर आणि कुशीनगर येथील तरुणींना नागपुरात बोलविले होते. पोलिसांनी डमी ग्राहकांमार्फत संपर्क करून कारवाई केली होती. सूत्रधाराने नागपुरात आणखी काही तरुणी बोलविल्याची माहिती पोलिसांना मिळाली. त्यानंतर सोनेगाव पोलिस ठाण्याच्या हद्दीतील हॉटेल फ्लोरा ईन येथे छापा टाकण्यात आला व तेथून एका तरुणीची सुटका केली. सेक्स रॅकेटचा मास्टरमाइंड समीर व त्याचा नागपुरातील साथीदार जोसेफ कुटी यांच्याविरोधात सीताबर्डी पोलिस ठाण्यात गुन्हा दाखल करण्यात आला आहे. पोलिसांनी जोसेफला अटक केली आहे. या रॅकेटमध्ये समीरचे आणखी दलाल नागपुरात कार्यरत आहेत. त्यांचादेखील पोलिसांकडून शोध सुरू आहे.