नागपूर : श्री क्षेत्र अदासा हे तीर्थक्षेत्र भाविकांचे श्रद्धास्थान आहे. या ठिकाणी दरवर्षी लाखोंच्या संख्येने भाविक येतात. त्यांना सर्व सोयी-सुविधा मिळण्याच्या दृष्टीने तीर्थक्षेत्राचा विकास होणे गरजेचे आहे. त्याबरोबरच पर्यटनासाठी हे क्षेत्र महत्त्वाचे असल्याने येथे ॲडव्हेंचर पार्कची निर्मिती करण्यात येणार असून, विविध खेळाच्या पार्क निर्मितीतून स्थानिकांना रोजगार उपलब्ध होईल, अशी आशा पशुसंवर्धन, दुग्ध व्यवसाय विकास, क्रीडा व युवक कल्याण मंत्री सुनील केदार यांनी व्यक्त केली.
श्री क्षेत्र अदासा येथील तीर्थक्षेत्र विकासाबाबत सादरीकरण द विदर्भ को ऑपरेटिव्ह मार्केटिंग फेडरेशन येथील कार्यालयात करण्यात आले, त्यावेळी ते बोलत होते. सहायक वनसंरक्षक पालवे, एनएमआरडीएच्या अधीक्षक अभियंता लीना उपाध्ये, वास्तुविशारद भिवगडे तसेच समाजिक वनीकरण विभाग व संबंधित विभागाचे अधिकारी यावेळी उपस्थित होते.
मनीष भारद्वाज यांनी सादरीकरणाद्वारे क्षेत्राच्या पर्यटनविषयक आराखड्याबद्दल अवगत केले. या क्षेत्रात भव्य कॉम्प्लेक्सची निर्मिती करण्यात येणार असून, त्या आतील भागात खेळाचे पार्क व बाहेरील भागात फुटबॉल हॉर्स रायडिंग, ५५ हेक्टर जमिनीवर वन्यजिवांकरिता ठेवण्यात येणार आहे. पर्यटकांसाठी विविध प्रकारची वाहने उपलब्ध करून देण्यात येणार आहेत, असे त्यांनी सांगितले. विविध प्रकारचे खाद्यान्नाचे स्टाॅल, पेंचमध्ये सौर ऊर्जेवर चालणारी नाव आहे. त्याच धर्तीवर येथेही तयार करण्याचे ठरविले आहे. स्काय सायकल, मल्लखांब व जिम्नॅस्टिक सुविधा उपलब्ध करून देण्यात येणार आहे. पेटी झु, एरो स्पोर्ट प्रामुख्याने परदेशात प्रसिद्ध आहे ते सुद्धा येथे आणण्याचा प्रयत्न आहे. या आराखडयानुसार विकासात्मक योजना राबविल्या तर निश्चितच भाविक व पर्यटकांना हे तीर्थक्षेत्र भावेल, असे त्यांनी सांगितले.