लोकमत न्यूज नेटवर्क
नागपूर : महापालिकेच्या उपद्रव शोध पथकाने शनिवारी १४ दुकाने, प्रतिष्ठानांवर कारवाई करून १ लाख ४१ हजार रुपयाचा दंड वसूल केला. दरम्यान, उपद्रव पथकाने शहरातील १०६ प्रतिष्ठाने व मंगल कार्यालयांची तपासणी केली.
मनपा आयुक्त राधाकृष्णन बी. यांच्या निर्देशानुसार उपद्रव शोध पथक प्रमुख वीरसेन तांबे यांच्या मार्गदर्शनाखाली झोन शोध पथकांनी ही कारवाई केली. लक्ष्मीनगर झोनअंतर्गत सहा मंगल कार्यालयांची तपासणी करुन २ हजाराचा दंड वसूल केला.. धरमपेठ झोनअंतर्गत आठ प्रतिष्ठानांची तपासणी करून ६० हजार रुपये दंड वसूल केला. हनुमाननगर झोन येथील सात प्रतिष्ठानांची तपासणी करण्यात आली. परंतु, कुठलाही दंड वसूल करण्यात आला नाही. धंतोली झोनअंतर्गत ८ मंगल कार्यालये व लॉनची तपासणी करण्यात आली. नेहरूनगर झोनमधील ११ प्रतिष्ठानांची तपासणी करण्यात आली.
गांधीबाग झोन क्षेत्रातील सहा प्रतिष्ठानांची तपासणी करून ३० हजार रुपये दंड वसूल केला. सतरंजीपुरा झोनमधील पाच प्रतिष्ठानांची तपासणी करून ९ हजार दंड वसूल केला. लकडगंज झोनअंतर्गत एकूण १२ प्रतिष्ठानांची तपासणी केली. आशीनगर झोनमध्येही १९ प्रतिष्ठाने तपासली. एकाला १५ हजार रुपये दंड केला. मंगळवारी झोनमधील २१ प्रतिष्ठानांची तपासणी केली. २५ हजार दंड वसूल केला.