नागपूर : अल्पवयीन मुलीचा विनयभंग करणाऱ्या आरोपीचा सीताबर्डी पोलिसांनी दोन दिवसात छडा लाऊन त्याला बेड्या ठोकल्या आहेत. सुफियान सिराज शेख (१९, रा. ठाकुर प्लॉट, मोठा ताजबाग, सक्करदरा) असे अटक करण्यात आलेल्या आरोपीचे नाव आहे. शनिवारी १८ मे रोजी सायंकाळी ५.३० वाजताच्या सुमारास १७ वर्षीय अल्पवयीन मुलगी ट्यूशन क्लासवरून अंबाझरी पोलिस ठाण्याच्या हद्दीत असलेल्या आपल्या घरी परत जात होती.
तेवढ्यात आरोपी सुफियान याने अल्पवयीन मुलीला थांबवून तिच्याशी अश्लील वर्तन केले. अल्पवयीन मुलीने आरडाओरड केल्यामुळे आरोपी तेथून पळून गेला होता. अल्पवयीन मुलीने दिलेल्या तक्रारीवरून सीताबर्डी पोलिसांनी आरोपी विरुद्ध कलम ३५४, ३५४ (ड), ३४१, सहकलम १२ पोक्सो कायद्यानुसार गुन्हा दाखल केला होता. या प्रकरणी सीताबर्डी पोलिसांनी तांत्रीक तपास करून आरोपीस अटक केली. चौकशीत आरोपीने केलेल्या गुन्ह्याची कबुली दिली.