लोकमत न्यूज नेटवर्क
नागपूर : २१९ दिवसानंतर आज बुधवारी नागपूर शहरात आपली बस(शहर बस)सेवा सुरू होत आहे. टप्प्याटप्प्याने रस्त्यावर बस चालविण्याचा निर्णय घेण्यात आला आहे. परिवहन समितीने सुरुवातीला ३० टक्के बस चालविण्याचा निर्णय घेतला होता. पहिल्या दिवशी पाच मार्गावर फक्त ४० बस धावतील. सोमवारी २ नोव्हेंबरपासून ९० बस सुरू करण्याचा निर्णय घेतला आहे. बुधवारी बर्डी ते हिंगणा ग्रामीण रुग्णालय मार्गावर १५ स्टँडर्ड बस धावतील. याशिवाय बर्डी ते बुटीबोरी एमआयडीसी गेट मार्गावर ९, बर्डी ते खापरखेडा दरम्यान ३, पिपळा फाटा ते हजारीपहाड दरम्यान ५ स्टँडर्ड बस धावतील. तर पारडी ते जयताळा महाल मार्गे ८ मिडी बस धावतील.
पुढील आठवड्यात हिंगण्यासाठी १५ आणि बुटीबोरीसाठी १४ बसेस दर १० मिनिटाच्या अंतराने सोडल्या जातील. एकूण १५ मार्गावर बस सुरू होतील. १३१६ फेऱ्यांच्या माध्यमातून एकूण २०९४०.३ कि.मी.बस धावणार असल्याचा विभागाचा अंदाज आहे. प्रवाशांची संख्या विचारात घेऊन बसची संख्या वाढविली जाईल.
बुटीबोरी, हिंगणा परिसारात उद्योग आहेत. ते पूर्ण क्षमतेने सुरू झाले आहेत. सणामुळे मागणीही वाढली आहे. अशा परिस्थितीत बस बंद असल्याने ये-जा करणाऱ्यांना अनेक अडचणींचा सामना करावा लागत आहे. यामुळेच बससेवा सुरू करण्याची मागणी केली जात होती. अखेर मनपा आयुक्त राधाकृष्ण बी. यांनी ३० टक्के बस चालविण्याला परवानगी दिली. ९० धावतील तर ९ सज्ज राहतील. एखादी बस बंद पडल्यास या बस संबंधित मार्गावर धावतील.
मिळालेल्या माहितीनुसार बर्डी ते खापरखेडा १०, पिपळा फाटा ते हजारीपहाड १०, पारडी ते जयताळासाठी ८ खरबी ते जयताळा १० बस सोडण्यात येतील. याशिवाय अन्य मार्गावर बस सोडण्यात येतील. राज्य परिवहन महामंडळाच्या दिशानिर्देशाचे प्रवाशांना पालन करावे लागेल. मास्क, सुरक्षित अंतर, सॅनिटायझरचा वापर अनिवार्य आहे. सकाळी ६ ते रात्री ८.३० दरम्यान विविध मार्गावर बस धावतील.
कंडक्टर-ड्रायव्हरची कमी
मागील सात महिन्यापासून बस सेवा बंद असल्याने कंडक्टर व ड्रायव्हर दुसऱ्या कामाला लागले आहे. यामुळे बस सेवा सुरळीत सुरू ठेवण्यासाठी कंडक्टर-ड्रायव्हर उपलब्ध करण्यासाठी तीन बस ऑपरेटरला चांगलीच कसरत करावी लागणार आहे. भविष्यात बस संख्या वाढवितानाही मनुष्यबळाची गरज भासणार आहे. यामुळे अडचणी येण्याची शक्यता आहे. तीन हजारांच्या आसपास कर्मचारी व अधिकारी या सेवेशी जुळले आहेत.
दर महिन्याला ३.१० कोटींचा तोटा
परिवहन विभागाच्या अंदाजान्रसार महिनाभर ९० बस चालवावयाच्या झाल्यास ३.१० कोटी रुपयाचा तोटा होणार आहे. एक बस दररोज २००कि.मी.धावते. तिकिटातून दररोज २.५३ लाखांचे उत्पन्न होते. अन्य खर्च गृहीत धरता ९० बस चालविण्यासाठी महिन्याला ३.८६ कोटी खर्च येईल.
२ नोव्हेंबरपासून या मार्गावर धावतील बसेस
मार्ग बसेस फेऱ्या
बर्डी ते हिंगणा १५ २२०
बर्डी ते बुटीबोरी १४ १८६
पारडी से जयताळा ८ ११२
पिपला फाटा ते हजारी पहाड १० १४६
बर्डी ते खापरखेडा १० १३७
बर्डी ते पारडी ६ ८२
बर्डी ते ऑर्डनन्स फॅक्ट्री ६ ८६
बर्डी ते फेटरी २ ३६
बर्डी ते शेष नगर २ ३४
बर्डी ते बहादुरा फाटा ५ ८२
खरबी ते जयताळा ८ १३०
खरबी ते पन्नासे ले-आऊट १ २२
पिपला फाटा तेहजारी पहाड १ १५
नारा ते मेडिकल चौक १ १४
नारी ते मेडिकल चौक १ १४