वाशिमच्या शिक्षकाचा आत्महत्येचा प्रयत्न

वाशिमच्या क्रांतिवीर लहूजी विद्या मंदिर या शाळेतील भानुदास खंदारे या सहायक शिक्षकाने मंगळवारी आझाद मैदानातील झाडावर चढून फाशी घेण्याचा प्रयत्न केला.

मुंबई : वाशिमच्या क्रांतिवीर लहूजी विद्या मंदिर या शाळेतील भानुदास खंदारे या सहायक शिक्षकाने मंगळवारी आझाद मैदानातील झाडावर चढून फाशी घेण्याचा प्रयत्न केला. गळ्यात दोरी टाकून आत्महत्येचा प्रयत्न करणाऱ्या खंदारे यांची आझाद मैदान पोलिसांनी योग्यवेळी समजूत काढून अनुचित प्रकार टाळला. तब्बल १५ मिनिटे चाललेल्या या गोंधळामुळे सीएसटी परिसरात एकच गर्दी जमली होती.शाळा विनाअनुदानित असताना १९९२ खंदारे या शाळेत रुजू झाले होते. अनुसूचित जातीच्या प्रवर्गांचे शिक्षक म्हणून संस्थेने त्यांचा प्रस्ताव सादर केला होता. मात्र अकोला शिक्षण विभागाने अप्रशिक्षित असल्याचे कारण देत त्यांचा प्रस्ताव नाकारला. मात्र त्या वेळी अनेक शाळांमध्ये अप्रशिक्षित शिक्षकांना मान्यता दिल्याचे निदर्शनास आणल्यानंतर खंदारे यांना मान्यता मिळाली. १९९७ साली शाळेला अनुदान मिळाले. त्या वेळी खंदारे यांची सेवा कायम करण्याऐवजी मुख्याध्यापकाने त्यांना प्रथामिकहून माध्यमिक वर्गांवर धाडले. शिवाय खंदारे यांच्या जागी दुसऱ्याच शिक्षकाची भरती केली. खंदारे यांनी सांगितले की, प्रामाणिकपणे शाळेची सेवा करत होतो. २ जून २००० साली अप्रशिक्षित शिक्षकांना सेवेत घेण्याचा शासन आदेश निर्गमित झाला. त्या वेळी मुख्याध्यापकांनी जाणीवपूर्वक डावलले. त्यामुळे डी.एड.चे शिक्षण घेतले. मात्र त्यानंतरही शिक्षण विभागाने अनुदानित तुकडीवर घेतले नाही. अखेर ३१ मे २००७ रोजी १५ वर्षांची सेवा मान्य करून विभागाने पदाला मान्यता दिली. १ जुलै २०११ रोजी सेवासातत्य झाल्याचे शिक्षणाधिकारी यांनी पत्र दिले. २१ जानेवारी २०१३ रोजी माध्यमिक वर्गांच्या तुकड्यांना २० टक्के अनुदान मंजूर झाले. त्यामुळे वनवास संपण्याची आशा निर्माण झाली होती. मात्र मुख्याध्यापकांनी येथेही अन्याय करत वेतन फाईल शिक्षण विभागाकडे पाठवलेली नाही. अशा परिस्थितीत मुख्याध्यापकावर कारवाई करण्याऐवजी शिक्षण विभाग दोषींना पाठीशी घालत असल्याचा खंदारे यांचा आरोप आहे. (प्रतिनिधी)