राज्यात लवकरच महापालिका निवडणुका होण्याची शक्यता आहे. या पार्श्वभूमीव गेल्या काही दिवसांपासून मनसे प्रमुख राज ठाकरे आणि शिवसेना ठाकरे गटाचे प्रमुख उद्धव ठाकरे एकत्र येण्याची चर्चा राजकीय वर्तुळात रंगत होती. मात्र असे असतानाच मनसे प्रमुख राज ठाकरे आणि मुख्यमंत्री देवेंद्र फडणवीस यांची आज (गुरुवार) वांद्रे येथील ताज लँड्स अँडमध्ये बैठक पार पडली. जवळपास १ तास या दोन्ही नेत्यांमध्ये चर्चा झाली. या चर्चेत नेमकं काय झाले याचा तपशील अद्याप समोर आला नाही मात्र, या भेटीमुळे राजकीय वर्तुळात चर्चांना उधाण आले आहे. यातच या भेटीसंदर्भात शिवसेना शिंदे गटाचे नेते संजय शिरसाट यांची पहिली प्रतिक्रिया आली आहे. महत्वाचे म्हणजे, यावेळी त्यांनी पुन्हा एकदा राज ठाकरे यांना ऑफर 'पेश' केली आहे.
शिरसाट म्हणाले, "मुख्यमंत्री देवेंद्र फडणवीस आणि राज ठाकरे यांची आज जी भेट झाली. त्याला निश्चितपणे राजकीय अर्थही आहे. मात्र, राज ठाकरे जेव्हा भेटतात, तेव्हा त्यांच्या काही सूचना आणि आमेही असतात. त्या दृष्टीनेही ते भेटलेले आहेत. म्हणून उद्याचे महानगर पालिकेचे समिकरणं काय होतील? अथवा उद्याची राजकीय परिस्थिती काय असेल? यावर आताच्या घडीला भाष्य करणे चुकीचे आहे. त्यांच्या भेटीनंतर, त्यासंदर्भातील जो काही खुलासा आहे, तो मुख्यमंत्री स्वतः अथवा राज साहेब स्वतः करतील." शिरसाट छत्रपती संभाजीनगर येथे माध्यमांसोबत बोलत होते.
दोन्ही ठाकरे एकत्र येण्यासंदर्भात बोलताना शिरसाट म्हणाले, "राजकारणात, निवडणुकीत कोण कुणाबरोबर आहे? कुणाची कुणाबरोबर युती होते? हे जोवर नक्की होत नाही. तोवर असे यू टर्न्स आपल्याला अनेक वेळा बघायला मिळतील. यामुळे यामुळे आजच्या भेटीचा थेट संबंध लावणे गैर आहे. जे काही होईल ते काही दिवसांतच आपल्याला लक्षात येईल."
"राजकारणात काहीही होऊ शकते. राजकारणात कधी काय होईल हे सांगता येत नाही. यामुळे एक पक्ष वाढवण्यासाठी, पक्ष मजबूत करण्यासाठी अशा युत्या कराव्या लागतात. मला वाटते की, राज साहेबांना यापूर्वीही आम्ही ऑफर दिली होती. आजही आमची ऑफर आहे. त्यांच्याकडे असलेले वक्तृत्व पाहता, ते चांगल्या प्रकारे महानगर पालिकांच्या निवडणुका लढू शकतात. त्यांनी सोबत यावे, अशी आमचीही त्यांना विनंती आहे," असेही शिरसाट म्हणाले.