ऑनलाइन लोकमत -
मुंबई, दि. 03 - भारतरत्न सचिन तेंडुलकर आणि लता मंगेशकर यांच्यावर एआयबी रोस्टचा विनोदवीर तन्मय भटने केलेल्या आक्षेपार्ह शेरेबाजी विरोधात सर्व स्तरातून टीका होत आहे. स्वत: लता मंगेशकर यांनी कोण तन्मय भट ? मी त्याला ओळखत नाही असं म्हणत त्याची जागा दाखवून दिली होती. लता मंगेशकरांच्या समर्थनार्थ अनेकांनी आपलं मत नोंदवल असताना अभिनेता गौरव गेरानेही तन्मय भटवर टीका केली आहे.
गौरव गेरानं अनोख्या पद्धतीने लता मंगेशकर यांची बाजू घेत तन्मय भटला त्याच्याच भाषेत उत्तर दिलं आहे. तन्मय भटप्रमाणे गौरव गेराने व्हिडिओ अपलोड केला आहे. 'माझ्या आई-वडिलांनी हा व्हिडिओ अपलोड करु नको असा सल्ला दिला होता, पण मला घाबरत जगायचं नाही आहे. आणि हो मी लतादीदींचा खुप मोठा फॅन आहे', असंही गौरव गेराने लिहिलं आहे.
एआयबी कॉमेडी मास्टर तन्मय भट्टनं मास्टर ब्लास्टर सचिन तेंडुलकर आणि ज्येष्ठ गानसम्राज्ञी लता मंगेशकरांचा अपमान करणारा वादग्रस्त व्हिडीओ स्नॅपचॅट आणि फेसबुकवर शेअर केला होता. या व्हिडीओमध्ये तन्मयनं अत्यंत खालच्या पातळीवर जाऊन सचिन तेंडुलकर आणि लता मंगेशकरांवर टीका केली होती. या वादग्रस्त व्हिडीओमध्ये सचिन आणि लता मंगेशकर यांच्या शाब्दिक चकमक झडल्याचं दाखवण्यात आलं होतं, त्यात अश्लील शब्दांचा वापर करण्यात आला होता. या व्हिडीओवरून तन्मय भट्ट याच्यावर चहूबाजूंनी टीका झाली होती. अनेक बॉलिवूडकरांनी हा व्हिडीओ विनोदी नसून, वादग्रस्त असल्याचं म्हटलं होतं.
या आधीही एआयबीनं अभिनेता रणवीर सिंग, अर्जुन कपूर आणि चित्रपट निर्माता करण जोअर यांच्याबाबत शिवीगाळ केल्याचं दाखवलं होतं. त्याप्रकरणी एआयबीविरोधात एफआयआर दाखल झाला होता. या व्हिडीओमध्ये तन्मयनं ज्येष्ठ गायिका लता मंगेशकरांना 'जॉन स्नोही मेला मग तुम्ही कधी मरणार आहात. तुमचा चेहरा आठ दिवस पाण्यात ठेवल्यासारखा दिसतो आहे', असे प्रश्न विचारून अत्यंत हीन भाषेत टीका केली होती. व्हिडीओवर अनुपम खेर, रितेश देशमुख, सेलिना जेटली आणि युवा सेना अध्यक्ष आदित्य ठाकरेंनीही सडकून टीका केली होती.