रिसोड : येथील तहसीलदार अमोल कुंभार यांच्या राहत्या घरी ६ ते १५ च्या मध्यरात्री अज्ञात चोरटयांनी घ्चोरी करुन घरातील रोख रक्कमेसह ४५ हजाराचा ऐवज लंपास केल्याची घटना सकाळच्या सुमारास उघडकीस आली.
याविषयी प्राप्त माहितीनूसार येथील तहसीलदार अमोल कुंभार हे हिंगोली रोडलगत गंगा मॉ विद्या मंदिराजवळ सतीश गुजरे यांच्या निवासस्थानी भाडयाने राहतात. तहसीलदारासाठी असलेल्या शासकीय निवासस्थानात मुलभूत सुविधा पुरेशा प्रमाणात उपलब्ध नसल्यानेच तहसीलदार कुंभार हे भाडयाच्या घरात वास्तव्यास आहेत.मागील दहा दिवसांपासून तहसीलदार कुंभार त्यांच्या परिवारासह बाहेरगावी गेले होते. नेमका याच संधीचा फायदा घेत रविवारी मध्यरात्री चोरटयांनी घराच्या समोरील दवाजाचे कुलुप,कोंडा लोखंडी रॉडने तोडून घरात प्रवेश केला. बराच वेळपर्यंत चोरटयांनी घरातील प्रत्येक खोलीतील सामानात मौल्यवान वस्तुंचा शोध घेतल्याचे यावेळी त्यांनी मोठया प्रमाणात घरातील साहित्याच्या केलेल्या नासधुस व फेकफाकीवरुन दिसून येत होते. बराच वेळ पर्यंत घरात वावरताना त्यांनी साहेबांच्या घरातील लाडू व शंकरपाळे या गोड खाद्यपदार्थांवर चांगलाच ताव मारला.यावेळी चोरटयांनी चोरुन नेलेल्या साहित्यामध्ये सॅमसंग कंपनीचा एलईडी, सॅमसंग कंपनीचा मोबाईल, लहान मुलांचे सोन्या चांदीचे दागिने, इतर वस्तुसह रोख दहा हजार रुपये असा एकूण ४५ हजार रुपयांच्या ऐवजाचा समावेश आहे. दरम्यान सोमवारला सकाळी तहसीलदार अमोल कुंभार हे बाहेरगाववरुन घरी परत आल्यानंतर चोरीची घटना उघडकीस आली. झालेल्या चोरीची माहीती तहसीलदार कुंभार यांनी ठाणेदार राऊत यांना तात्काळ दिली. रिसोड पोलिसांनी चोरीचा पंचनामा करुन अज्ञात चोरटयांच्या विरोधात गुन्हा दाखल केला आहे. चोरीचा छडा तातडीने लावण्याच्या दृष्टीकोनातून पोलिसांनी वाशिम येथून ठसेतज्ज्ञ, श्‍वानपथकालाही पाचारण केले होते. चोरीचा तपास ठाणेदार सुरेशकुमार राऊत यांच्या मार्गदर्शनाखाली सहाय्यक पो. निरिक्षक संजय गवई, पो.उप.निरिक्षक रवि हुंबेकर, पो.हे.कॉ.शांताराम राठोड, पो.कॉ.सचिन शिंदे करीत आहेत.