ऑनलाइन लोकमत
मुंबई, दि. 11 - अमेरिकेतील बृहन्महाराष्ट्र मंडळाचे नितीन जोशी यांना "लोकमत महाराष्ट्रीयन ऑफ द इयर" सोहळ्यात ग्लोबल टोर्चबेअरर या विशेष पुरस्काराने सन्मानित करण्यात आले. हरिभाऊ बागडे आणि अभिनेता अतुल परचुरे यांच्या हस्ते नितीन जोशी यांच्या हस्ते त्यांना पुरस्कार प्रदान करण्यात आला.
मुंबईतील सहारा स्टार हॉटेलमध्ये हा कार्यक्रम सुरू आहे. आपल्या उत्तुंग कर्तृत्वाने समाजाला दिशा आणि प्रेरणा देण्याचा वसा घेतलेल्या सेवाव्रतींचा गौरव करण्याच्या "लोकमत"च्या संकल्पाचे चौथे पर्व यंदा साकारत आहे. युपीएएल प्रस्तुत लोकमत ‘महाराष्ट्रीयन ऑफ द इयर’ पॉवर्ड बाय कर्म आणि अजिंक्य डीवाय पाटील विद्यापीठ, पुणे यांच्या सहकार्याने साकारत आहे.
हा सोहळा थेट पाहा फेसबुकवर...
नितीन जोशी यांची थोडक्यात माहिती
उत्तर अमेरिकेतील बृहन्महाराष्ट्र मंडळाच्या 17 व्या अधिवेशनदरम्यान नितीन जोशी यांची बृहन्महाराष्ट्र मंडळाच्या अध्यक्षपदावर निवड करण्यात आली होती.
नितीन जोशी यांचे संगीत, वाचन, लेखन, काव्य, वक्तृत्व, उर्दू गझल हे त्यांचे विशेष आवडीचे विषय.
बृहन्महाराष्ट्र मंडळाची उद्दिष्टे
1. अमेरिकेत स्थायिक झालेल्या तसेच नव्याने आलेल्या, प्रत्येक मराठी माणसापर्यंत पोहोचण्याचा प्रयत्न करणं
2. महाराष्ट्राच्या लहानमोठ्या गावातून अमेरिकेत येऊन व्यवसायात यशाचे शिखर गाठलेल्या महाअमेरिकनांनी महाराष्ट्रातील आपल्या मातृगावाशी जोडले जावे म्हणून प्रयत्न करणं
3. अमेरिकेतील मराठी उद्योजकतेला चालना देण्यासाठी आणि तेथील यशस्वी व्यावसायिकांचा महाराष्ट्रातील उद्योजकांशी संपर्क प्रस्थापित करण्यासाठी 2007 मध्ये स्थापिलेले ‘नेम’ (नॉर्थ अमेरिकन मराठी आंत्रप्रेनर्स) व्यासपीठ अधिक सक्रिय करणं
4 .अमेरिकेत उच्च शिक्षणासाठी येणाऱ्या महाराष्ट्रीयन युवक, युवतींचा अमेरिकेतील उद्योजकांशी संपर्क जुळावा यासाठी नियोजन करणं
या भूमीशी ज्यांनी रक्ताचे आणि घामाचे नाते जोडले, ज्यांनी आपले आयुष्य इथल्या समृद्धीसाठी वेचले, अशा महाराष्ट्रीयनांचा सन्मान करण्यासाठी "लोकमत"ने सुरू केलेल्या पुरस्काराची एव्हाना परंपरा झाली आहे. "लोकमत"च्या संपादकीय चमूने केलेले मंथन, जगभरातील कोट्यवधी वाचक तसेच नामवंत ज्युरींचा कौल यातून विजेत्यांची निवड साकारत आहे. १४ क्षेत्रांमधील प्रसिद्धीच्या शिखरावर पोहोचलेल्या मान्यवरांप्रमाणेच राज्याच्या कानाकोपऱ्यात इतरांना प्रेरणादायी ठरेल, अशा कार्याचे बीज पेरणाऱ्यांचाही शोध या निमित्ताने घेतला गेला. समाजमनावर प्रभाव टाकणाऱ्या तसेच विकास आणि समृद्धीच्या वाटचालीत भर टाकलेल्या नानाविध क्षेत्रांमधील प्रतिभेचा आरसा म्हणून युपीएल प्रायोजित "लोकमत महाराष्ट्रीयन ऑफ द इयर" पुरस्कारांकडे पाहिले जात आहे.
ज्यांनी महाराष्ट्राचे नाव उंचावले, इथल्या मातीची शान वाढविली आणि इथे प्रगती घडवून आणली अशा १४ क्षेत्रांतील मान्यवरांना या पुरस्काराने सन्मानित करण्यात येणार आहे. प्रसिद्धीच्या झोतापासून दूर राहिलेल्या बहुआयामी व्यक्तिमत्त्वांचा गौरव करण्यासाठी लोकमतने उचललेले पाऊल हे आता केवळ सोहळा नव्हे, तर गौरवशाली परंपरा बनू पाहात आहे.
लोकमत ‘महाराष्ट्रीयन ऑफ द इयर’ पुरस्काराच्या यंदाच्या चौथ्या पर्वातील विजेते ठरविण्याची मोलाची कामगिरी महाराष्ट्राच्या अभिमानात भर टाकणाऱ्या ११नामांकित ज्युरींनी पार पाडली आहे. जाहीर झालेली नामांकने, त्यावर जगभरातील वाचकांनी भरभरून दिलेली मते या पार्श्वभमीवर तब्बल साडेतीन तासांच्या विचार मंथनातून केंद्रीय मंत्री नितीन गडकरी यांच्यासह ११ नामवंत ज्युरींनी विजेत्यांच्या नावांवर शिक्कामोर्तब केले आहे.
‘लोकमत’ने केलेल्या मंथनातून जाहीर झालेली १४ कॅटेगरीतील नामांकने आणि लोकमताचा कौल यावर अंतिम निवडीचा साज चढविण्याची जबाबदारी आनंदाने पार पाडणाऱ्या ज्युरी मंडळात केंद्रीय भूपृष्ठ वाहतूक मंत्री नितीन गडकरी, डॉ. प्रकाश आमटे, अर्णव गोस्वामी, मिलिंद देवरा, महेश भट्ट, विक्रम लिमये, विक्रम श्रॉफ, सुनील सूद, डॉ. रमाकांत पांडा, विजय दर्डा आणि मृणाल कुलकर्णी यांचा सहभाग आहे.
यंदा मोलाची भर...: आता चौथ्या पर्वात "लोकसेवा-समाजसेवा", "परफॉर्मिंग आर्ट्स", "कला", "क्रीडा", रंगभूमी, मराठी चित्रपट, "उद्योग", ‘पायाभूत सेवा’, "राजकारण", "प्रशासन (आश्वासक)" यातील एकंदर १३ कॅटेगरींसह "वैद्यकीय" क्षेत्राचा समावेश करण्यात आला आहे. विशेष म्हणजे, या १४ पुरस्कारांच्या व्यतिरिक्त स्पर्धेच्या पलीकडे जाणारे उत्तुंग कर्तृत्व सिद्ध केलेल्या सहा महनीय व्यक्तींना विशेष पुरस्कार दिला जाणार आहे.
नामांकन प्राप्त व्यक्तींना जगभरातील वाचकांनी लोकमतच्या वेबसाइटवर मतदानाद्वारे दिलेली पसंती तसेच ११ नामवंत ज्युरींचा कौल यांच्या एकत्रित विचारातून या पुरस्काराचे मानकरी ठरत आहेत. तब्बल दोन दशलक्ष वाचकांनी या मतदानात सहभागी होत १४ कॅटेगरीतील नामांकनांसाठी दीड कोटी मते नोंदविली.
सर्व पुरस्कारांच्या माहितीसाठी क्लीक करा