ऑनलाइन लोकमत
जळगाव, दि. १९ : उरी येथील भारतीय लष्कराच्या तळावर दहशतवाद्यांनी केलेल्या हल्लाचा निषेध म्हणून स्वराज्य निर्माण सेनेतर्फे सोमवारी मूक मोर्चा काढून पाकिस्तानच्या कृत्याचा निषेध करण्यात आला. यावेळी ‘हल्ला बोल हल्ला बोल...पाकिस्तानवर हल्ला बोल...’ असा नारा फलकांच्या माध्यमातून मोर्चेकऱ्यांनी दिला. मोर्चाचे नेतृत्त्व शिवसेनेचे गजानन मालपुरे, माहिती अधिकार कार्यकर्ते दीपक गुप्ता, जळगाव जागृत मंचचे शिवराम पाटील, मोहन तिवारी, सार्वजनिक गणेश मंडळाचे दीपक जोशी यांनी केले. शिवतीर्थ मैदानापासून मोर्चाला सुरुवात झाली. मोर्चा नवीन बसस्थानक, महात्मा गांधी उद्यान, स्वातंत्र्य चौक मार्गे जिल्हाधिकारी कार्यालयाजवळ पोहचला.
यावेळी पाकिस्तानच्या दहशतवादी कृत्याचा निषेध करण्यात आला. त्यानंतर मोर्चेकऱ्यांनी जिल्हाधिकाऱ्यांना आपल्या मागण्यांचे निवेदन दिले. मोर्चात बबलू पिपरिया, स्मिता वेद, निवेदिता ताठे यांच्यासह जळगावकर सहभागी झाले होते. काळे फुगे व फिती लावून निषेध मोर्चात सहभागी झालेल्या महिला व नागरिकांनी पाकिस्तानच्या दहशतवादी कृत्याचा निषेध म्हणून हातात काळे फुगे घेतले होते.
तर सर्वच मोर्चेकऱ्यांनी आपल्या हाताच्या दंडावर काळ्या फिती लावून निषेध नोंदविला. मूक मोर्चातील सहभागी नागरिकांच्या हातातील फलकांवरील घोषवाक्य हे लक्ष वेधून घेत होते.